ვოლოდიმირ ზელენსკის თქმით, 26 ქვეყანა მზად არის უკრაინის უსაფრთხოების გარანტიებისთვის. განცხადება უკრაინის პრეზიდენტმა ტელეგრამ გვერდზე გაავრცელა და დასავლეთის ქვეყნებში გამართული შეხვედრები შეაჯამა. უკრაინის პრეზიდენტმა აღნიშნა, რომ „მშვიდობის გარანტირებამდე, რუსეთს მშვიდობისკენ უნდა უბიძგონ“.
„მთელი თავისუფალი ევროპა, ამერიკა, კანადა, იაპონია, ავსტრალია, ახალი ზელანდია და მსოფლიოს სხვა პარტნიორები ჩვენთან არიან. ჩვენი შედეგი: უკვე 26 ქვეყანა მზადაა, უკრაინის უსაფრთხოების გარანტირებისთვის ქმედებები განახორციელოს. მადლობელი ვარ ყველა ლიდერის ჩვენი ერთობლივი მუშაობისთვის.
ჩვენ ყველაფერი უნდა გავაკეთოთ, რომ მოსკოვმა შეწყვიტოს ყველა სამშვიდობო ინიციატივის უარყოფა და გაიგოს ომის გახანგრძლივების შედეგები. მკაცრი სანქციები და ტარიფები – ევროპული და ამერიკული ერთობლივი ძალისხმევა ამის გასაღებია. არ უნდა დარჩეს შესაძლებლობა რუსეთის საომარი მანქანის დაფინანსებისთვის. შემდეგ საჭიროა მეტი მუშაობა, რათა ზეწოლა ნამდვილად ხელშესახები იყოს“, – განაცხადა ზელენსკიმ.