„ალტერნატივა გერმანიისთვის“ კანდიდატების სიკვდილი შეთქმულების თეორიებს იწვევს“,- ამ სათაურით სტატიას euronews-ი აქვეყნებს.
მედიის ცნობით, მუნიციპალური არჩევნების კამპანიის დროს AfD-ს ექვსი კანდიდატი გარდაიცვალა, ბოლო დღეებში კი კიდევ ერთი კანდიდატის გარდაცვალების შესახებ გავრცელდა ინფორმაცია, რის შედეგადაც დაღუპულთა რიცხვი შვიდამდე გაიზარდა.
გერმანიის პოლიცია აცხადებს, რომ არცერთ გარდაცვალებასთან დაკავშირებით დანაშაულის ჩადენის მტკიცებულება არ არსებობს, დაღუპულთა რაოდენობის გამო გაჩენილი ეჭვები AfD-ს პრესსპიკერმაც უარყო. ამის მიუხედავად, AfD-ს კანდიდატების გარდაცვალებამ შეთქმულების თეორიები გამოიწვია, რომელთა თანახმადაც, პოლიტიკოსების დაღუპვა გარკვეულწილად განზრახ იყო გამოწვეული.
AfD-ის 46 წლის ლიდერმა, ალის ვაიდელმა, X-ზე გამოაქვეყნა პოსტი, რომელშიც ერთ პარტიაში ამდენი წევრის გარდაცვალება „სტატისტიკურად თითქმის შეუძლებლად“ იყო შეფასებული. ბრიტანელმა ულტრამემარჯვენე აქტივისტმა ტომი რობინსონმა, X-ზე კითხვა დასვა: „რა ხდება აქ?“, რაზეც ილონ მასკმა ერთი სიტყვით უპასუხა: „უცნაურია“.
euronews-ი წერს, რომ ცნობილი ფიგურებისგან ასეთმა მინიშნებებმა, შეთქმულების თეორიის გავრცელება წაახალისა. კონსერვატორული და ულტრამემარჯვენე მედიასაშუალებები კი აქვეყნებდნენ სტატიებს, რომლებშიც გარდაცვალების ფაქტებს „იდუმალად“ და „მოულოდნელად“ აფასებდნენ, თუმცა ამ თეორიების მხარდამჭერი მტკიცებულებები არ არსებობს.
ჩრდილოეთ ვესტფალიაში მუნიციპალური არჩევნები 14 სექტემბერს ჩატარდება. მათში მონაწილეობას 20 ათასამდე კანდიდატი მიიღებს.