ვატიკანში მიმდინარე ათასწლეულში კანონიზაციის პირველი ცერემონია გაიმართა. პაპმა ლეო XIV-მ ლონდონში დაბადებული იტალიელი კარლო აკუტისი წმინდანად შერაცხა.
აკუტისი 2006 წელს, 15 წლის ასაკში ლეიკემიით გარდაიცვალა. ის აქტიურად უწევდა პოპულარიზაციას ქრისტიანობას ინტერნეტში: ქმნიდა ვებ-გვერდებს ეკლესიისა და სკოლისთვის, აგროვებდა ინფორმაციას სასწაულებზე სპეციალურ ონლაინ-პორტალზე. ამის გამო მას „ღვთის ინფლუენსერს“ ეძახდნენ. ახალგაზრდა კათოლიკეებს შორის ის რწმენისადმი თანამედროვე მიდგომის სიმბოლოდ იქცა. აკუტისი დიდ ბრიტანეთში დაიბადა, მაგრამ იტალიაში ცხოვრებდა.
კათოლიკური ეკლესიის წესების თანახმად, კანონიზაციისთვის სულ მცირე ორი აღიარებული სასწაულია საჭირო – სიცოცხლის ან გარდაცვალების შემდეგ ადამიანმა უნდა ჩაიდინოს ქმედებები, რომლებსაც მეცნიერება ვერ ახსნის. აკუტისის შემთხვევაში ორივე სასწაული ოფიციალურად პაპმა ფრანცისკემ აღიარა.
პირველი სასწაული ბრაზილიელ ბიჭს უკავშირდება, რომელსაც იშვიათი დაავადება ჰქონდა, მაგრამ 2013 წელს, კარლოსადმი მიმართული ლოცვის შემდეგ ბავშვი მოულოდნელად გამოჯანმრთელდა.
მეორე შემთხვევა 2022 წელს, კოსტა-რიკელ გოგონას უკავშირდება. მან სერიოზული ტრავმა მიიღო, როდესაც ფლორენციაში ველოსიპედით გადაადგილდებოდა. მას შემდეგ, რაც გოგონას დედამ აკუტისის საფლავზე ილოცა, გოგონას მდგომარეობა მკვეთრად გაუმჯობესდა. 10 დღეში ის საავადმყოფოდან გაწერეს, სამედიცინო კვლევამ კი ტრავმის კვალი ვერ აღმოაჩინა.