ისრაელის არმია შეტევის ახალ ტალღას აანონსებს და სახმელეთო მანევრისთვის ემზადება, ღაზის მცხოვრებლებს კი ევაკუაციისკენ კიდევ ერთხელ მოუწოდებს. ამის შესახებ „როიტერი“ ავრცელებს ინფორმაციას.
როგორც მედია წერს, ისრაელი იმუქრება, რომ „ჰამასი“ უკანასკნელ მძევლებს თუ არ გაათავისუფლებს, ღაზაში სამხედრო შეტევები გაძლიერდება და ანკლავს „ძლიერი ქარიშხალი“ გადაუვლის.
„როიტერის“ ინფორმაციით, მილიონიანი ქალაქის აღება თითქმის ორწლიანი ომის დასრულებისკენ მიმართულ ცეცხლის შეწყვეტის მცდელობებს ართულებს, რადგან ისრაელის პრემიერ-მინისტრი და მისი პარტნიორები ახორციელებენ იმ გეგმას, რომელიც „ჰამასის“ ორი დარჩენილი საყრდენის განადგურებას მოიცავს.
„როიტერი“ წერს, რომ ევაკუაციის ბრძანებამ ღაზის მცხოვრებლებში პანიკა გამოიწვია. მოქალაქეთა ნაწილი სამხრეთისკენ გადაადგილებას გეგმავს, ნაწილი კი წასვლაზე უარს აცხადებს.