ევროკომისიის პრეზიდენტმა ურსულა ფონ დერ ლაიენმა ევროპარლამენტისადმი ყოველწლიურ განაცხადა, რომ მისი უწყება უფრო მკაცრ პოზიციას დაიკავებს ისრაელთან დაკავშირებით, რამაც პარლამენტში აპლოდისმენტები და სიცილი გამოიწვია. სტატიას ამ შინაარსით Politico ავრცელებს.
როგორც ფონ დერ ლაიენმა განაცხადა, ევროკავშირი სანქციებს დაუწესებს „ექსტრემისტულად განწყობილ მინისტრებსა“ და ებრაული დასახლებების გაფართოების მომხრეებს, აგრეთვე შეაჩერებს ისრაელისთვის ორმხრივ გადახდებს. ეს ყველაფერი ღაზის სექტორში ჰუმანიტარული კრიზისის გამო მოხდება.
გარდა ამისა, ევროკომისია წევრ სახელმწიფოებს ისრაელსა და ევროკავშირს შორის მოქმედი ასოცირების შეთანხმების გარკვეული პუნქტების შეჩერებას შესთავაზებს, თუმცა, როგორც გამოცემა წერს, ეს საკითხი გადაიდება, რადგან წევრ სახელმწიფოებს შორის ერთსულოვნება არ არსებობს.
„ის, რაც ხდება ღაზაში, მიუღებელია“, – თქვა ფონ დერ ლაიენმა .პარლამენტში გამოსვლისას. „ჩვენ ექსტრემისტი მინისტრებისა და ებრაული დასახლებების გაფართოების ძალადობრივ მომხრეების წინააღმდეგ სანქციების შემოღებას შემოგთავაზებთ“.
ფონ დერ ლაიენმა აღიარა, რომ ეროვნულ მთავრობებს შორის არსებულმა უთანხმოებამ ხელი შეუშალა უფრო კონკრეტულ მოქმედებებს, ევროკავშირის კვლევების დაფინანსების შეჩერების ჩათვლით, და აღნიშნა, რომ ეს საზოგადოებაში უკმაყოფილებას იწვევს.
„ჩვენ ისრაელის ორმხრივ დახმარებას შევაჩერებთ“, – განაცხადა მან და დასძინა, რომ „იად ვაშემის“ ჰოლოკოსტის მუზეუმსა და ისრაელის სამოქალაქო საზოგადოებას ეს არ შეეხება. მეტი კონკრეტიკის დასახელებისგან მან თავი შეიკავა.