პოლონეთმა რუსეთ-ბელარუსის სამხედრო წვრთნების გამო ბელარუსთან საზღვარი დახურა. აღნიშნულის შესახებ პოლონეთის პრემიერ-მინისტრმა, დონალდ ტუსკმა განაცხადა.
ბრძანება ძალაში დღეს, 12 სექტემბერს შევიდა. ყველა საზღვარზე მოძრაობა ორივე მიმართულებით დაიხურა. შეწყვეტილია საავტომობილო, სარკინიგზო და საფეხმავლო მიმოსვლა.
რუსეთ-ბელარუსული ერთობლივი სამხედრო წვრთნები, რომელიც ცნობილია, როგორც „ზაპადი“, დღეს დაიწყო.
პოლონეთის შინაგან საქმეთა მინისტრმა, მარცინ კერვინსკიმ განაცხადა, რომ ეს სამხედრო მანევრები პირდაპირ მიმართულია „პოლონეთისა და ევროკავშირის წინააღმდეგ“.
რუსეთმა პოლონეთს ბელარუსთან საზღვრის გახსნისკენ მოუწოდა. მანამდე, ლატვიის სეიმმა რუსეთისა და ბელარუსის მიერ დაგეგმილი სამხედრო წვრთნების გამო აღნიშნულ ორ ქვეყანასთან საზღვრის დროებით დახურვის გადაწყვეტილება მიიღო.