აშშ-ის პრეზიდენტთან, დონალდ ტრამპთან ალასკაში გამართული შეხვედრის შემდეგ, რუსეთის პრეზიდენტმა უკრაინაზე იერიშების გაძლიერების გადაწყვეტილება მიიღო, – ამის შესახებ „ბლუმბერგი“ რუს მაღალჩინოსნებზე დაყრდნობით წერს.
წყაროების თქმით, ალასკაზე შეხვედრისა და უკრაინის მიერ რუსეთის პირობების უარყოფის შემდეგ, პუტინი მივიდა გადაწყვეტილებამდე, რომ სამხედრო ესკალაცია არის საუკეთესო გზა უკრაინის იძულებისთვის, რომ რუსეთის პირობებს დათანხმდეს მოლაპარაკებების დროს. გამოცემის ცნობითვე, პუტინი ასევე ნაკლებად ვარაუდობს, რომ ტრამპი რაიმე არსებით ზომებს მიიღებს უკრაინის თავდაცვის გასამყარებლად.
„პუტინის განზრახვაა, გააგრძელოს უკრაინის ენერგეტიკულ ქსელსა და სხვა ინფრასტრუქტურაზე დარტყმები”, – აცხადებენ წყაროები.
წყაროების თქმით, ალასკაში შეხვედრისას პუტინი დაარწმუნეს, რომ ტრამპი არ არის დაინტერესებული რუსეთ-უკრაინის ომში ჩარევით.
„ბლუმბერგი“ უკრაინის საჰაერო ძალების სარდლობის ინფორმაციაზე დაყრდნობით წერს, რომ ტრამპისა და პუტინის მოლაპარაკებების შემდეგ ერთი თვის განმავლობაში რუსული უპილოტო აპარატებისა და რაკეტების დარტყმების რაოდენობა უკრაინაზე დაახლოებით 46%-ით გაიზარდა.
გამოცემასთან საუბრისას რუსი მაღალჩინოსნები ამბობენ, რომ პუტინი ასევე აკვირდება ისრაელის ომს ღაზაში. რუსეთის ლიდერი მიიჩნევს, რომ ნეთანიაჰუს ქმედებები ბევრად უფრო მკაცრია ღაზაში, ვიდრე რუსეთის უკრაინაში და აღნიშნავს, რომ იგი ძირითადად მიღებული იყო ამერიკისა და ევროპის მთავრობების მიერ, რაც ახშობს მათ კრიტიკას მოსკოვის მისამართით.
„რუსეთის მმართველი გააგრძელებს ნებისმიერ დიალოგს ამერიკის შეერთებულ შტატებთან, მაგრამ შემდეგშიც იმას გააკეთებს, რასაც საჭიროდ მიიჩნევს”, – ამბობენ წყაროები „ბლუმბერგთან“.