მიუხედავად იმისა, რომ ეროვნული გვარდიის განლაგების შესახებ აშშ-ის პრეზიდენტის დონალდ ტრამპის გადაწყვეტილება სასამართლომ მეორედ დაბლოკა, ტრამპი კალიფორნიიდან პორტლენდში ჯარისკაცების განლაგებას მაინც გეგმავს, – ამის შესახებ ინფორმაციას „ბიბისი“ ავრცელებს.
მედიის ინფორმაციით, დონალდ ტრამპმა კალიფორნიიდან ორეგონში ჯარები მას შემდეგ გაგზავნა, რაც სასამართლომ პორტლენდში ეროვნული გვარდიის განლაგების მცდელობა დაბლოკა.
აშშ-ის პრეზიდენტის ეს გადაწყვეტილება მოსამართლის ბრძანებას უგულებელყოფს. კალიფორნიის გუბერნატორმა, გევინ ნიუსომმა ტრამპის ამ ნაბიჯს კანონის დარღვევა უწოდა და პირობა დადო, რომ ქმედების წინააღმდეგ სარჩელს შეიტანდა. ამასთან, აშშ-ის ილინოისის შტატის გუბერნატორის, ჯეი ბი პრიცკერის განცხადებით კი, პრეზიდენტი ტრამპი ტეხასის ეროვნული გვარდიის 400 წევრის განლაგებას ილინოისში, ორეგონსა და სხვა ადგილებში განლაგებას გეგმავს. ამ გადაწყვეტილებას ჯეი ბი პრიცკერი ტრამპის უსაფუძვლო შემოჭრას უწოდებს და აცხადებს, რომ „ეროვნულ გვარდიაში მომსახურე ადამიანები პოლიტიკურ ბუტაფორიებად არ უნდა გამოიყენებოდნენ“.
„ბიბისის“ ინფორმაციით, პენტაგონმა კალიფორნიის ეროვნული გვარდიის 200 წევრის პორტლენდში გადაყვანა უკვე დაადასტურა.
„პრეზიდენტმა ტრამპმა გამოიყენა თავისი კანონიერი უფლებამოსილება პორტლენდში ფედერალური აქტივებისა და პერსონალის დასაცავად, ძალადობრივი არეულობებისა და სამართალდამცავ ორგანოებზე თავდასხმების შემდეგ“, – განაცხადა თეთრი სახლის პრესსპიკერმა, აბიგაილ ჯექსონმა.
მისივე თქმით, კალიფორნიის გუბერნატორი გევინ ნიუსომიც „კანონმორჩილი მოქალაქეების მხარეს უნდა იდგეს და არა იმ დამნაშავეების, რომლებიც პორტლენდსა და მთელი ქვეყნის მასშტაბით ქალაქებს ანადგურებენ“.
ცნობისთვის, ბოლო პერიოდში აშშ-ში ფედერალური სამართალდამცავი ორგანოების მოწინააღმდეგეთა საპროტესტო გამოსვლები გახშირდა. დემონსტრანტები მიგრაციის პოლიტიკას აკრიტიკებენ.