აშშ-ის პრეზიდენტმა, დონალდ ტრამპმა შვედ ეკოაქტივისტს, გრეტა ტუნბერგს „პრობლემების შემქმნელი“ უწოდა მას შემდეგ, რაც ტუნბერგს სხვა მოხალისეებთან ერთად ფლოტილიით ღაზას სექტორის საზღვაო ბლოკადის გარღვევა სცადა.
„ის უბრალოდ პრობლემების შემქმნელია. ის აღარ არის გარემოსდაცვითი საქმიანობით დაინტერესებული, ახლა ამით არის დაკავებული? მას ბრაზის მართვის პრობლემა აქვს. ვფიქრობ, ის ექიმს უნდა ესტუმროს. ის ძალიან გიჟია“, – აღნიშნა დონალდ ტრამპმა.
საპასუხოდ, ისრაელიდან დეპორტაციის შემდეგ გრეტა ტუნბგერმა ჟურნალისტებს განუცხადა, რომ დონალდ ტრამპიც იტანჯება ბრაზის მართვის პრობლემებით.
„სიამოვნებით მივიღებდი ნებისმიერ რეკომენდაციას ამ ე.წ. ბრაზის მართვის პრობლემებთან გამკლავებაში, რადგან, თქვენი შთამბეჭდავი რეპუტაციით თუ ვიმსჯელებთ, როგორც ჩანს, თქვენც იტანჯებით ამით“, – განაცხადა ტუნბერგმა.
ცნობისთვის, ისრაელმა შვედი ეკოაქტივისტის, გრეტა ტუნბერგის და ღაზის ფლოტილიის გემებზე მყოფი 171 პირის დეპორტაცია განახორციელა.
მედიის ცნობით, ღაზის მიმართულებით მიმავალ 40-ზე მეტ ხომალდზე სულ 470 ადამიანი იმყოფებოდა, როდესაც ისინი ისრაელმა შეაჩერა.
ფლოტილიის შემადგენლობაში მყოფ ხომალდებზე მყოფი აქტივისტების ნაწილის დეპორტაცია ისრაელმა მანამდე განახორციელა. ისინი ამტკიცებენ, რომ ისრაელში დაკავების დროს მათ არასათანადოდ ეპყრობოდნენ.