ისრაელის პრემიერმინისტრის, ბენიამინ ნეთანიაჰუს ოფისის სპიკერის, შოშ ბედროსიანის თქმით, მოელიან, რომ ჰამასი ისრაელელ მძევლებს ხვალ, 13 სექტემბერს, დილით გაათავისუფლებს. მანვე დაამატა, რომ ისრაელი მზადაა, მძევლები უფრო ადრეც მიიღოს.
ამის შესახებ ბედროსიანმა პრესკონფერენციაზე ილაპარაკა.
ბედროსიანის ცნობით, როდესაც დაადასტურებენ, რომ ჰამასმა ისრაელში შეთანხმებით გათვალისწინებული 20 მძევალი დააბრუნა, პალესტინელი პატიმრების გათავისუფლებას დაიწყებს.
ნეთანიაჰუს ოფისის სპიკერმა თქვა, რომ ტერორისტული დაჯგუფება მძევლებს წითელი ჯვრის ორგანიზაციას გადასცემს, რომელიც შემდგომ მათ ისრაელში გადაიყვანს. მისივე თქმით, ჰამასს ამჯერად პროცესთან დაკავშირებით პროპაგანდისტული ვიდეოების გავრცელება ეკრძალება.
ცოტა ხნით ადრე Al Jazeera ჰამასის მაღალჩინოსანზე დაყრდნობით წერდა, რომ ტერორისტული დაჯგუფება მძევლებს ღაზის სექტორში სამი სხვადასხვა ადგილიდან გაათავისუფლებს.
ისრაელის სასამართლო მედიცინის ეროვნულმა ინსტიტუტმა ისრაელური მედიისთვის მიცემულ განცხადებაში თქვა, რომ მძევლების ცხედრების ვინაობის უახლესი ტექნოლოგიით დასადგენად ემზადებიან, რასაც შესაძლოა რამდენიმე საათი ან რამდენიმე დღე დასჭირდეს.
ცნობისთვის, ისრაელის თავდაცვის ძალებმა (IDF) 10 ოქტომბერს, 12:00 საათისთვის, დაასრულა ღაზის სექტორში სამშვიდობო გეგმით შეთანხმებულ ხაზამდე სამხედრო ნაწილების გამოყვანა, რითაც ცეცხლის შეწყვეტის შეთანხმება ოფიციალურად შევიდა ძალაში და დაიწყო 72-საათიანი პერიოდი, რომლის განმავლობაშიც ჰამასის ტერორისტულმა ორგანიზაციამ მძევლები უნდა გაათავისუფლოს.
სამხედრო ძალების გამოყვანა ისრაელის მხრიდან ღაზის გარკვეულ ნაწილებში საარტილერიო დაბომბვისა და საჰაერო იერიშების ფონზე მიმდინარეობდა. ამასთან, ცეცხლის შეწყვეტის დაწყებამდე ჰამასის სნაიპერმა IDF-ის რეზერვისტი მოკლა. შეთანხმებულ ხაზამდე ჯარების გამოყვანის შემდეგ, ისრაელის კონტროლქვეშ კვლავ რჩება ღაზის სექტორის 58%.
ცეცხლის შეწყვეტის შეთანხმების ძალაში შესვლიდან 72 საათის განმავლობაში ჰამასი შეთანხმებისამებრ ვალდებულია, ყველა ცოცხალი მძევალი გაათავისუფლოს და ისრაელს ყველა გარდაცვლილი მძევლის ცხედარი გადასცეს, რომელზეც ხელი მიუწვდება. შესაბამისად, ჰამასს ვადა 13 ოქტომბრის შუადღემდე აქვს.