აშშ-ის პრეზიდენტმა, დონალდ ტრამპმა მოუწოდა შესაბამის ორგანოებს, განაახლონ გამოძიება 2019 წელს მის წინააღმდეგ დაწყებული იმპიჩმენტის პროცედურის თაობაზე.https://truthsocial.com/@realDonaldTrump/posts/115361806192142146
ამასთან, დონალდ ტრამპმა კონგრესმენი ადამ შიფი კორუფციაში დაადანაშაულა. შიფი 2019 წელს წარმომადგენელთა პალატის დაზვერვის კომიტეტის თავმჯდომარის მოადგილე იყო და აქტიურ როლს თამაშობდა იმპიჩმენტის პროცესში.
„უკრაინის იმპიჩმენტის სკანდალი (ჩემს წინააღმდეგ) ბევრად უფრო დიდი უკანონო თაღლითობა იყო, ვიდრე უოტერგეიტი. გულწრფელად ვიმედოვნებ, რომ შესაბამისი ორგანოები, კონგრესის ჩათვლით, გამოიძიებენ ამას, ადამ „შიფტი“ შიფი ძალიან არაკეთილსინდისიერი და კორუმპირებული იყო. ძალიან ბევრი კანონი და პროცედურა დაირღვა“, – წერს დონალდ ტრამპი სოციალურ ქსელში.
ცნობისთვის, 2019 წელს დონალდ ტრამპისა და უკრაინის პრეზიდენტ ვოლოდიმირ ზელენსკის სატელეფონო საუბრის სტენოგრამასთან დაკავშირებით წარმომადგენელთა პალატაში იმპიჩმენტის პროცედურა დაიწყო.
დემოკრატების მტკიცებით, ჯო ბაიდენის იმიჯის შესალახად, ტრამპი უკრაინის ხელისუფლებაზე ზემოქმედებას ცდილობდა, რათა ბაიდენისა და მისი ვაჟის წინააღმდეგ პოლიტიკურად მოტივირებული გამოძიება დაწყებულიყო.