კიევი და ლონდონი „თურქული ნაკადის“ წინააღმდეგ საბოტაჟს ამზადებენ, – ამის შესახებ რუსეთს ფედერალური უსაფრთხოების სამსახურის დირექტორმა, ალექსანდრე ბორტნიკოვმა განაცხადა.
„ჩვენ გვაქვს ინფორმაცია, რომ ბრიტანელები, უკრაინის სადაზვერვო სამსახურებთან ერთად, გაზსადენის წინააღმდეგ დივერსიას ამზადებენ“, – აღნიშნა ბორტნიკოვმა დსთ-ს წევრი სახელმწიფოების უსაფრთხოების სააგენტოებისა და სპეციალური სამსახურების ხელმძღვანელთა საბჭოს სხდომაზე.
მისივე განცხადებით, უკრაინა, ბრიტანეთის საგარეო დაზვერვის სამსახურთან ერთად, გეგმავს თავდასხმებს კრიტიკული ინფრასტრუქტურის ობიექტებზე, მათ შორის უპილოტო საჰაერო საშუალებების, უპილოტო ნავების და საბრძოლო მოცურავეების გამოყენებით.
რუსეთის უსაფრთხოების სამსახურის დირექტორის ცნობით, ბრიტანეთის არმიის სპეციალური დანიშნულების რაზმების და ბრიტანეთის საგარეო დაზვერვის სამსახურის ინსტრუქტორები ასევე მონაწილეობდნენ კასპიის მილსადენის კონსორციუმის წინააღმდეგ დარტყმების სერიის მომზადებაში.
„სწორედ ბრიტანელები არიან ისინი, ვინც პროვოკაციებისა და დეზინფორმაციის გზით ახორციელებენ ბრიუსელის ხაზს, რათა ხელი შეუშალონ შეთანხმების მიღწევას. ისინი დაჟინებით მოითხოვენ ევროპის დაჩქარებულ მომზადებას რუსეთთან შეიარაღებული დაპირისპირებისთვის, მოუწოდებენ უკრაინაში ჯარების გაგზავნისკენ და ხელს უწყობენ იქ ფრენის აკრძალვის ზონის შექმნის იდეას“, – განაცხადა ალექსანდრე ბორტნიკოვმა.