საფრანგეთის პრემიერ-მინისტრ სებასტიან ლეკორნუს განცხადებით, ჩინური ონლაინ-პლატფორმა „შეინის“ საქმიანობა ქვეყანაში იმ დრომდე იქნება შეჩერებული, სანამ კომპანია არ დაამტკიცებს, რომ საფრანგეთის კანონებს იცავს. სკანდალმა პარიზში ჩინური კომპანიის პირველი ფიზიკური მაღაზიის გახსნას ჩრდილი მიაყენა.
ოთხშაბათს, 5 ნოემბერს, საფრანგეთმა ქვეყანაში „შეინის“ საქმიანობის დროებითი შეჩერების პროცედურები მას შემდეგ დაიწყო, რაც ონლაინ-პლატფორმაზე გასაყიდად განკუთვნილი ბავშვთა სექს-თოჯინები და ნივთები აღმოაჩინეს.
„პრემიერ-მინისტრის მითითებით, მთავრობა იწყებს „შეინის“ საქმიანობის შეჩერების პროცესს იმ დროის განმავლობაში, რაც პლატფორმას დასჭირდება იმის სადემონსტრაციოდ, რომ მთელი მისი კონტენტი ჩვენს კანონებსა და რეგულაციებს მთლიანად შეესაბამება“, – აღნიშნულია საფრანგეთის ფინანსთა სამინისტრომ განცხადებაში.
მთავრობა გამოდის დაპირებით, რომ ვითარებას „48 საათის განმავლობაში“ შეისწავლის.
„შეინმა“ უკვე განაცხადა, რომ თოჯინების გამყიდველებს სანქციები დაუწესა, საიტზე სექს-თოჯინების გაყიდვა აკრძალა და დამოუკიდებლად გადაწყვიტა, დროებით დაეხურა თავისი სავაჭრო სივრცე საფრანგეთში, რათა გარე პლატფორმაზე მუშაობის წესისთვის „გადაეხედა და გაემკაცრებინა“.
„მომხმარებელთა უსაფრთხოება და ჩვენი ბაზრის მთლიანობა ჩვენთვის მთავარი პრიორიტეტებია“, – აღნიშნულია ჩინურმა კომპანიის განცხადებაში.
სექსუალური დატვირთვის მქონე საბავშვო თოჯინების გაყიდვამ, რაც საფრანგეთის მომხმარებელთა დაცვის ორგანომ უკვე დაგმო, საფრანგეთის დედაქალაქში პროტესტი გამოიწვია. ზოგიერთი დემონსტრანტი ახლად გახსნილ მაღაზიაში შეიჭრა, საიდანაც ისინი დაცვის თანამშრომლებმა გაიყვანეს.
ფრანგული პრესის ცნობით, მარსელის მახლობლად დააკავეს მამაკაცი, რომელსაც „შეინში“ შეძენილი ბავშვის გარეგნობის სექს-თოჯინა აღმოაჩნდა.
საფრანგეთის პროკურატურამ ამ კომპანიის წინააღმდეგ გამოძიება „არასრულწლოვანთა პორნოგრაფიული სურათების ან გამოსახულებების გავრცელების“ მუხლით დაიწყო.
აღსანიშნავია, რომ არასრულწლოვანთათვის ხელმისაწვდომი მოძალადეობრივი, პორნოგრაფიული ან ღირსების შემლახველი სურათების გავრცელებისთვის ბრალი აქვს წაყენებულ ჩინურ „ალიექსპრესს“, „ტემუს“ და ამერიკულ „ვიშს“.
საფრანგეთის ტექნოლოგიების მინისტრმა, ან ლე ჰენაფმა ევროკომისიას სთხოვა, „შეინის“ საქმიანობის შესახებ გამოძიება დაიწყოს. ევროკავშირის აღმასრულებელი ორგანო ამ კომპანიის პროდუქტების უსაფრთხოების საკითხთან დაკავშირებით გამოძიებას უკვე აწარმოებს.