უკრაინის პრეზიდენტმა, ვოლოდიმირ ზელენსკიმ განაცხადა, რომ არ სჯერა ბელარუსის პრეზიდენტის, ალექსანდრ ლუკაშენკოს ბოლოდროინდელი მცდელობების, ვითომდა სიკეთე გამოავლინოს უკრაინელი ხალხის მიმართ, რადგან სწორედ მისი ქვეყნის ტერიტორიიდან დაესხა თავს რუსეთი უკრაინას 2022 წლის 24 თებერვალს.
„ლუკაშენკომ არ უნდა დაივიწყოს, რადგან ახლა ის მედიაში ზედმეტად მოლაპარაკე გახდა და აჩვენებს, როგორი კეთილია ჩვენი ხალხის მიმართ. მისი სიკეთე, რომელიც რაკეტებთან ერთად დილის ოთხ საათზე მოვიდა, ჩვენ არ გვჭირდება. თუ ის ფიქრობს, რომ თავისი სიტყვებით ცოტათი დაგვავიწყებს… ჩვენ ახალგაზრდები ვართ, ყველაფერი ძალიან კარგად გვახსოვს და ის მაინც გადაიხდის საფასურს იმისთვის, რაც გააკეთა, კერძოდ, თავისი ტერიტორიიდან შეტევის დაშვებისთვის. ამას არავინ დაივიწყებს“, – აღნიშნა უკრაინის პრეზიდენტმა.