რუსეთი ხარკოვის ოლქის ქალაქ ვოვჩანსკთან ჯარებს აგროვებს, – ამის შესახებ ინფორმაციას უკრაინის პრეზიდენტი ვოლოდიმირ ზელენსკი ავრცელებს.
უკრაინის პრეზიდენტის განცხადებით, მოსკოვს ბრძოლის ველზე წარმატების დემონსტრირება სჭირდება და არ აქვს მნიშვნელობა ეს ვოვჩანსკში მოხდება თუ პოკროვსკში.
„ვოვჩანსკში სიტუაცია დაძაბულია და რუსი მებრძოლების დაგროვებით შესაძლოა, კიდევ გართულდეს. მათი რაოდენობა ამ დღისთვის 600-ს შეადგენს,“ – აცხადებს ვოლოდიმირ ზელენსკი.
ზელენსკის თქმით, მტრისთვის მნიშვნელოვანი ძველი ნარატივის დაბრუნებაა.
„რუსეთისთვის მნიშვნელოვანია, რომ პოკროვსკის რეალურად დასაკავებლად ყველაფერი გააკეთოს, რათა ბრძოლის ველზე წარმატება აჩვენოს – იქნება ეს ვოვჩანსკი თუ სხვა რამ. მათ წარმატება სჭირდებათ, რათა დააბრუნონ ნარატივი – ჩვენ გითხარით, რომ დონბასს დავიკავებდით“, – აღნიშნა ვოლოდიმირ ზელენსკი.
ამასთან, ზელენსკიმ განაცხადა, რომ მხოლოდ ოქტომბრის თვეში რუსეთმა 25 ათასი ჯარისკაცი დაკარგა. უკრაინის პრეზიდენტის თქმით, ეს ზუსტი მაჩვენებელია, რაც ვიდეომტკიცებულებებით დასტურდება.