უწყებათაშორისი სამეთაურო-საშტაბო სწავლება „დიდგორი 2025“ მონაწილე უწყებების წარმომადგენელთა დაჯილდოებით დასრულდა, – ინფორმაციას საქართველოს თავდაცვის სამინისტრო ავრცელებს.
უწყების ცნობით, დახურვის ღონისძიებას თავდაცვის მინისტრის პირველი მოადგილე პაატა პატიაშვილი, თავდაცვის ძალების მეთაური, გენერალ-ლეიტენანტი გიორგი მათიაშვილი, თავდაცვის ძალების ოფიცერთა კორპუსი და სხვადასხვა სახელმწიფო უწყების წარმომადგენლები დაესწრნენ.
„„დიდგორი 2025“-ის ხელმძღვანელმა – თავდაცვის ძალების მეთაურის მოადგილემ, გენერალ-მაიორმა ჯონი ტატუნაშვილმა სწავლება დადებითად შეაფასა და მონაწილეებს სწავლების წარმატებით აღსრულებისთვის მადლობა გადაუხადა. ღონისძიებაზე სწავლებაში მონაწილე უწყებების წარმომადგენლები და სამხედრო მოსამსახურეები მედლებით, საპატიო დაფებით, კოინებითა და სერტიფიკატებით დაჯილდოვდნენ.
სწავლება საშტაბო და საველე კომპონენტებს მოიცავდა. გარემოებები წინასწარ განსაზღვრული იმიტირებული სცენარის მიხედვით ვითარდებოდა. საშტაბო კომპონენტი კრწანისში მდებარე სიმულაციების, კავშირგაბმულობისა და ინფორმაციული სისტემების ცენტრში იყო განთავსებული, საიდანაც სწავლების მონაწილეები საველე კომპონენტის მიმდინარეობას აკვირდებოდნენ. „დიდგორის“ სწავლებაში წელს პირველად ჩაერთო სსიპ სამხედრო გაწვევისა და რეკრუტირების ეროვნული სააგენტო, რომელმაც, კომპეტენციის ფარგლებში, იმიტირებული სცენარის მიხედვით, სამობილიზაციო რეზერვთან დაკავშირებული ისეთი ღონისძიებები გაათამაშა, როგორიცაა რეზერვის შეტყობინება, გამოძახება და თავშეყრის პუნქტებამდე მიყვანა.
სწავლება „დიდგორი 2025“ მიზნად ისახავდა კრიზისული სიტუაციის, საგანგებო და საომარი მდგომარეობის დროს სამთავრობო უწყებებს შორის კოორდინაციისა და ურთიერთქმედების დახვეწას. „დიდგორი 2025“-ში სახელმწიფო უწყებების 5000-მდე წარმომადგენელი მონაწილეობდა. შტაბები საქართველოს მასშტაბით 25 ლოკაციაზე იყო გაშლილი, სწავლება 29 საველე კომპონენტს მოიცავდა“, – აღნიშნულია გავრცელებულ ინფორმაციაში.