გუშინ აქციაზე წაიკითხავდნენ თუ არ წაიკითხავდნენ ამ მანიფესტს, მნიშვნელობა არ ჰქონდა, დილით ელისაშვილი სასამართლოში მაინც შევარდებოდა. შეიძლება ეს სასოწარკვეთილების ბრალიც არის. ალბათ ეგონა, რომ გუშინ ის აქცია ხელისუფლებას გადააყენებდა, ჩავარდა სასოწარკვეთილებაში, ნახა სიზმარი და მერე ამისი ასრულება მოინდომა, – ამის შესახებ პარტია „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.
მისივე თქმით, „დიფ სთეითი“, იგივე „გლობალური ომის პარტია“, საქართველოში დამარცხებულია.
„არაერთხელ გვითქვამს, რომ „დიფ სთეითი“, იგივე „გლობალური ომის პარტია“, თავისი აქაური წარმომადგენლობით, საქართველოში დამარცხებულია. 4 ოქტომბერს ეს დამხობის სცენარი, რევოლუციის სცენარი და საერთოდ მათი გამარჯვების ყოველგვარი ხიბლი საბოლოოდ გადატყდა და დაიმსხვრა. ამის შემდეგ ძალიან გამწარებულები არიან და ელისაშვილის შემთხვევა ამისი კლასიკური მაგალითია. შეიძლება ახლა ამაზეც გვითხრან, რომ გამოხატვის თავისუფლების ფორმატშიაო, არ გაგიკვირდეთ. გამოვლენ და იტყვიან, რომ გამთენიისას ოპოზიციურად განწყობილ ადამიანს შეუძლია სასამართლოში შეჭრა, ფანჯრების ჩამსხვრევა, ფიზიკური შეურაცხყოფის მიაყენება მანდატურებისთვის და ასე შემდეგ.
აი, ამ ადამიანებს უნდათ მოსვლა საქართველოს ხელისუფლებაში. ძალაუფლება არ აქვთ და როგორ იქცევიან, ძალაუფლებას რომ მისცემ, ხომ წარმოგიდგენიათ, ორჯერ და სამჯერ უარესს გააკეთებენ. ეს არის კლასიკური მაგალითი იმისა, თუ როგორია „დიფ სთეითის“, „გლობალური ომის პარტიის“ აქაური წარმომადგენლების სახე. ვინც ამათ მხარს უჭერს, მათი პასუხი მაინტერესებს, როგორ გაამართლებენ ამ პროცესებს.
გუშინ აქციაზე წაიკითხავდნენ თუ არ წაიკითხავდნენ ამ მანიფესტს, მნიშვნელობა არ ჰქონდა, დილით ელისაშვილი სასამართლოში მაინც შევარდებოდა. შეიძლება ეს სასოწარკვეთილების ბრალიც არის. ალბათ ეგონა, რომ გუშინ ის აქცია ხელისუფლებას გადააყენებდა, ჩავარდა სასოწარკვეთილებაში, ნახა სიზმარი და მერე ამისი ასრულება მოინდომა“, – განაცხადა მაჭარაშვილმა.
ცნობისთვის, შინაგან საქმეთა სამინისტროში განაცხადეს, რომ „ლელო – ძლიერი საქართველოს“ წევრმა, ალეკო ელისაშვილმა დღეს, დილით, გამთენიისას თბილისის საქალაქო სასამართლოს კანცელარიის შენობის დაწვა სცადა.