ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა „დღის ქრონიკაში“ გერმანიის ელჩის, პეტერ ფიშერის განცხადება შეაფასა, სადაც ელჩი ამბობს, რომ საქართველოს ფაილი დახურულია.
„გერმანიის ელჩთან დაკავშირებით რაიმე სერიოზული კომენტარის გაკეთება სამწუხაროდ უკვე შეუძლებელია. იგი არა მხოლოდ შიდა საქმეებში, არამედ პირდაპირ იჭრება ევროკავშირის ელჩის, ბატონი ჰერჩინსკის კომპეტენციაშიც. რაღაც შეფასებებს აკეთებს, რომელთან დაკავშირებითაც მას არანაირი უფლებამოსილება არ გააჩნია“, – აღნიშნა ლევან მაჭავარიანმა.
მან ასევე ისაუბრა ევროპის საბჭოს დეკემბრის სამიტზეც.
„რაც შეეხება ვიზალიბერალიზაციას, ეს იქნება წინაპირობა, თუ რას გადაწყვეტენ ევრობიუროკრატები. მცდელობებს არ აკლებენ და მუდმივად ხელოვნური აჟიოტაჟს რეჟიმში ჰყავთ საქართველო. ეს [ვიზალიბერალიზაცია] მათი შანტაჟის მექანიზმის მჭიდში ბოლო ტყვია არის და არ მგონია ეს ტყვია გამოიყენონ, რადგან ისინი ვერ რწმუნდებიან იმაში, რომ მათი დასაყრდენი მდიდარი „ენჯეოები“ და რადიკალური ოპოზიცია შეძლებენ საქართველოში რევოლუციის მოხდენას“, – აღნიშნა ლევან მაჭავარიანმა.