„ჩვენთვის ალეკო ელისაშვილის დღევანდელი ქმედება მიუღებელი და გაუმართლებელია,“ – ამის შესახებ „ლელო – ძლიერი საქართველოს მიერ სოციალურ ქსელში გამოქვეყნებულ განცხადებაშია ნათქვამი.
როგორც „ლელო – ძლიერი საქართველოს“ მიერ გავრცელებულ განცხადებაშია ნათქვამი, რეჟიმს არ უნდა მიეცეს საშუალება, რომ სისტემური ძალადობითა და უსამართლობით სასოწარკვეთილებამდე მიგვიყვანოს და უარი გვათქმევინოს ტირანიასთან ბრძოლის მშვიდობიან და კანონიერ გზებზე.
„ჩვენთვის ალეკო ელისაშვილის დღევანდელი ქმედება მიუღებელი და გაუმართლებელია. ალეკო ელისაშვილი არაერთხელ გამხდარა რეჟიმის მხრიდან უსამართლობისა და ძალადობის მსხვერპლი და მისი აღიარება დასტურია, რომ ეს არის რეჟიმის წინააღმდეგ ერთი ადამიანის თავგანწირული ქმედება. რეჟიმს არ უნდა მივცეთ საშუალება, რომ სისტემური ძალადობითა და უსამართლობით სასოწარკვეთილებამდე მიგვიყვანოს და უარი გვათქმევინოს ტირანიასთან ბრძოლის მშვიდობიან და კანონიერ გზებზე, რაც იყო და იქნება „ძლიერი საქართველო- ლელოს“ ამოსავალი პრინციპი“, – აღნიშნულია „ლელო – ძლიერი საქართველოს“ განცხადებაში.
ცნობისთვის, შინაგან საქმეთა სამინისტრომ გაავრცელა ინფორმაცია, რომ დაკავებულია კოალიცია „ძლიერი საქართველო – ლელოს“ ერთ-ერთი ლიდერი ალეკო ელისაშვილი, რომელმაც დღეს, გამთენიისას თბილისის საქალაქო სასამართლოს კანცელარიის შენობის დაწვა სცადა.
ალეკო ელისაშვილის ადვოკატის, გიორგი რეხვიაშვილის განცხადებით, ელისაშვილი ნანობს, რომ საქმე ბოლომდე ვერ მიიყვანა, ქმედება კი პროტესტის გააზრებული ფორმა იყო.