„ერთიანი ნეიტრალური საქართველოს“ ერთ-ერთმა დამფუძნებელმა, ნანა კაკაბაძემ გაფართოების საკითხებში ევროკომისრის, მარტა კოსის განცხადება გადაცემაში „EURO ანატომია“ შეაფასა.
„ქართული სახელმწიფო მზად უნდა იყოს იმისათვის, რომ ნებისმიერი, არაკანონიერი ქმედება, გარედან იქნება ეს ინსპირირებული თუ ქვეყნის შიგნით, უნდა აღიკვეთოს და ამისთვის მზად უნდა ვიყოთ. საკმაო პრაქტიკა გავიარეთ იმისა, რომ გარედან ხდება ჩვენი ქვეყნის წინააღმდეგ ისეთი ნაბიჯების გადადგმა, რომელიც პირდაპირ წინააღმდეგობაში მოდის ჩვენს სუვერენიტეტთან, ჩვენს არჩევანთან – გარედან შემოტანილი თანხები ხმარდება ქვეყნის შიგნით ხალხის უმრავლესობის მიერ არჩეული ხელისუფლების დამხობის მცდელობას და არა იმ სანუკვარ მიზნებს, რომლისთვისაც ჩვენ გვინდოდა დასავლეთი, როგორც პარტნიორი“, – აღნიშნა ნანა კაკაბაძემ.
მისი თქმით, მარტა კოსის განცხადებაში პირდაპირ ნათქვამია, რომ ისინი ეძებენ გზებს იმისათვის, რომ საქართველოში შემოიტანონ შავი ფული.
„ჩვენი საზოგადოების დიდი როლი უნდა იყოს ის, რომ ყველა ასეთ ქმედებაზე უნდა გვქონდეს ჯანსაღი რეაგირება. რა თქმა უნდა, შავი ხვრელების აღმოფხვრას საზოგადოება ვერ შეძლებს, მაგრამ ასეთ ნეგატიურ ქმედებებს, საკუთარი ქვეყნის მიმართ წინააღმდეგობა უნდა გაუწიოს საზოგადოებამ. ხელისუფლებამ კი ყველაფერი უნდა გააკეთოს, რომ შავი ფულის შემოდინება ქვეყანაში არ ხდებოდეს“, – აღნიშნა ნანა კაკაბაძემ.
ნანა კაკაბაძემ ასევე დასძინა, რომ მარტა კოსს, ისევე როგორც ფაშისტ ლიბერალებს დასავლეთში, სურვილი აქვთ, დაამხონ ხალხის მიერ არჩეული ხელისუფლება და ქვეყნის სათავეში დასვან თავიანთი მორჩილი და მათგან მართული ხელისუფლება.