ლევან მახაშვილის თქმით, სიცრუეა ის განცხადებები, რომ თითქოს საქართველო თავს არიდებს განცხადებებს და არ გმობს რუსეთის აგრესიას უკრაინასთან მიმართებით. ევროპასთან ინტეგრაციის საპარლამენტო კომიტეტის თავმჯდომარე „ქრონიკასთან“ აღნიშნავს, რომ საქართველომ სადაც შესაძლებლობა ჰქონდა ყველა პლატფორმა გამოიყენა იმისთვის, რომ უკრაინასა და უკრაინელ ხალხს გვერდში დასდგომოდა.
„სადაც ამისი შესაძლებლობა და რესურსი გვქონდა ყველა საერთაშორისო პლატფორმა გამოვიყენეთ: ეუთო, ევროპის საბჭო, გაერო და ა.შ. რომ მხარი დაგვეჭირა უკრაინისთვის და უკრაინის მოსახლეობას გვერდში დავდგომოდით ყველა იმ გამოწვევის შესახებ, რის წინაშეც დღეს დგას.
ჩვენ შევუერთდით კონკრეტულ ინიციატივას ეუთოს ფარგლებში, რამდენიმე დღის წინ გაეროს გენერალურ ასამბლეის ფარგლებში შევუერთდით კიდევ ერთ მნიშვნელოვან დოკუმენტს გატაცებული უკრაინელი ბავშვების დაბრუნების მოთხოვნასთან დაკავშირებით და ეს ასეც გაგრძელდება. იმის ფონზე, როდესაც ხელისუფლებას ცრუ ბრალდებებს უყენებენ, რომ ვითომ ჩვენ რაიმე პრორუსულ პოლიტიკას ვახორციელებთ, ასეთი ტიპის გადაწყვეტილებები არის ყველაზე კარგი მტკიცებულება, რომ ეს არის მხოლოდ ცრუ ბრალდებები“, – აღნიშნა ლევან მახაშვილმა.
ეუთო-ს 40-ზე მეტმა წევრმა სახელმწიფომ, მათ შორის საქართველომ, უკრაინის ენერგეტიკულ ინფრასტრუქტურაზე რუსეთის მიზანმიმართული თავდასხმები დაგმო.