პოლონეთსა და უკრაინას შორის პარტნიორობის ელემენტი დავკარგეთ, ამას ღიად ვაცხადებ, – ამის შესახებ პოლონეთის პრეზიდენტმა, კაროლ ნავროცკიმ პოლონურ გამოცემასთან ინტერვიუში განაცხადა.
ნავროცკის განცხადებით, პოლონეთი უკრაინას მხარს უჭერს და მომავალშიც გააგრძელებს, თუმცა, მისივე თქმით, ქვეყნებმა უნდა ისწავლონ ფუნქციონირება, როგორც პარტნიორებმა და არა როგორც „უმცროსმა პარტნიორებმა“.
„ისეთი განცდა მაქვს, თითქოს პრეზიდენტი ვოლოდიმირ ზელენსკი ბოლო რამდენიმე წლის განმავლობაში შეეჩვია პოლონეთის, როგორც ვალდებულად აღქმას, თითქოს ჩვენთან არაფრის შეთანხმება და საუბარიც კი არ არის საჭირო, რადგან ჩვენ ყოველთვის მათთან ვიყავით და ყველაფერს გავცემდით. ვოლოდიმირ ზელენსკი უნდა იყოს მთავარი პირი, რომელიც დაინტერესებულია პოლონეთის მოლაპარაკებების მაგიდასთან ყოფნით. ეს ასე იქნებოდა, თუ ჩვენი ურთიერთობები სათანადოდ იქნებოდა სტრუქტურირებული. ამასობაში, პრეზიდენტი ზელენსკი პოლონეთს ხედავს როგორც სტაბილურ, აშკარა აქტივს, რომელიც არ საჭიროებს რაიმე განსაკუთრებულ ნაბიჯებს და ის გაცილებით მზადაა დასავლეთ ევროპელ ლიდერებთან ურთიერთობისთვის“, – განაცხადა პოლონეთის პრეზიდენტმა.
ამასთან, კაროლ ნავროცკიმ აღნიშნა, რომ უკრაინის მხარდაჭერა პოლონეთის სტრატეგიულ ინტერესებშია და ეს არ შეიცვლება, რადგან, მისი თქმით, უკრაინა პოლონეთის ეგზისტენციალურ მტერს – რუსეთს ებრძვის და ღირებულებებს იცავს.
ამასთან, როგორც პოლონეთის პრეზიდენტმა განაცხადა, უკრაინის პრეზიდენტი 19 დეკემბერს ვარშავას ეწვევა. მისივე თქმით, ორ ქვეყანას შორის ურთიერთობებში დროა იმ პარტნიორობის, რომელიც აქამდე აკლდათ.