რუსეთის მიერ გავრცელებულ ცნობას ნოვგოროდში პრეზიდენტ ვლადიმერ პუტინის რეზიდენციაზე იერიშის მცდელობის შესახებ შეერთებული შტატების ყოფილი ელჩი ნატოში კურტ ვოლკერი გამოეხმაურა.
მისი განცხადებით, მოსკოვი ამას მხოლოდ სიტყვებით ამტკიცებს, ფაქტებით კი ამ დრომდე არ ადასტურებს.
ვოლკერი მიიჩნევს, რომ თუკი თავდასხმა მართლაც მოხდა, ამაში გასაკვირი არაფერია, მით უმეტეს, რომ ორი ქვეყანა საომარ მდგომარეობაშია, თავად პუტინის რეჟიმი კი კიევსა და უკრაინის სახელისუფლებო შენობებზე თავდასხმებს არ ერიდება.
„რუსეთს არაერთხელ ჰქონია უკრაინის პრეზიდენტზე თავდასხმის მცდელობა. ეს ომია, რომელიც რუსეთმა დაიწყო, და, თუ მოსკოვს რუსეთის ტერიტორიაზე თავდასხმების შეწყვეტა სურს, ამისთვის საკმარისია თავად შეწყვიტოს ომი. ეს ომი არავის სურს. მას მხოლოდ პუტინი აწარმოებს და ამ დრომდე არანაირი ნიშანი არ არის, რომ მას ომის დასრულება სურდეს. პუტინი სისტემატურად ესხმის თავს უკრაინას და აქვს მაქსიმალური მოთხოვნები. მას ტერიტორიების მითვისება, უკრაინის დემილიტარიზება და ქვეყნის მთავრობის დამორჩილება სურს“, – განაცხადა ვოლკერმა.