აშშ-ის სახელმწიფო მდივანი, მარკო რუბიო ვაშინგტონში ჟურნალისტებს შეხვდა და გრენლანდიასთან დაკავშირებით ტრამპის ადმინისტრაციის გეგმებზე ისაუბრა.
კითხვაზე, განიხილება თუ არა გრენლანდიაში სამხედრო ინტერვენცია, რუბიომ პირდაპირ პასუხს თავი აარიდა.
„მე აქ დანიაზე ან სამხედრო ინტერვენციაზე სასაუბროდ არ მოვსულვარ. მათ მომავალ კვირას შევხვდები. სწორედ მაშინ გვექნება ეს საუბრები, მანამდე კი დასამატებელი არაფერი მაქვს“, – აღნიშნა სახელმწიფო მდივანმა.
მარკო რუბიომ ხაზგასმით აღნიშნა, რომ დონალდ ტრამპის სურვილი, აშშ-მა გრენლანდია შეიძინოს, ახალი არ არის.
რუბიოს თქმით, ტრამპი პირველი პრეზიდენტი არ არის, ვინც ამ საკითხს განიხილავს.
„პრეზიდენტი ამაზე ჯერ კიდევ პირველი ვადის დროს საუბრობდა. არსებობს კონკრეტული ინტერესი და ის სხვა პრეზიდენტებსაც ჰქონდათ“, – განაცხადა სახელმწიფო მდივანმა.
გრენლანდია დანიის სამეფოს შემადგენლობაში შემავალი ავტონომიური ტერიტორიაა, რომელმაც არაერთხელ განაცხადა, რომ კუნძული „არ იყიდება“.