აშშ-ის შიდა უსაფრთხოების დეპარტამენტის ინფორმაციით, ოთხშაბათს, მინეაპოლისში ჩატარებული ოპერაციის დროს, საიმიგრაციო და საბაჟო სამსახურის (ICE) აგენტმა ავტომობილში მყოფი ქალი სასიკვდილოდ დაჭრა.
„მსხვერპლი აშშ-ის მოქალაქე იყო, რომელიც ოპერაციას აკვირდებოდა და ჩვენს მიგრანტ მეზობლებზე ზრუნავდა“, – განუცხადა მინეაპოლისის საკრებულოს წევრმა, ჯეისონ ჩავესმა ABC News-ს.
შიდა უსაფრთხოების დეპარტამენტის პრესსპიკერის თქმით, ქალი „ჩვენი სამართალდამცველების მანქანით გადავლას ცდილობდა“, როდესაც საიმიგრაციო და საბაჟო სამსახურის ოფიცერმა მას სასიკვდილო ჭრილობა მიაყენა.
მან ხაზგასმით აღნიშნა, რომ საიმიგრაციო და საბაჟო სამსახურის ოფიცერმა „თავდაცვითი გასროლები“ განახორციელა, ხოლო თავად ქალი „არეულობის მონაწილეთა“ ჯგუფის წევრად მოიხსენია.
აშშ-ის შიდა უსაფრთხოების მდივანმა, კრისტი ნოემმა განაცხადა, რომ მომხდარი ინციდენტი იყო „შიდა ტერორიზმის აქტი“.