ნიკოლას მადუროს დაპატიმრების მიუხედავად, ჩავისტური რეჟიმი, როგორც ჩანს, ტრამპის ადმინისტრაციის თანხმობით ინარჩუნებს ძალაუფლებას, ხოლო დემოკრატიული ტრანზიციის პერსპექტივა ბუნდოვანი ხდება, – წერს ფრანგული გაზეთი Le Figaro.
„ნიკოლას მადუროს დაკავებით გამოწვეული შოკისა და სიხარულის, შემდეგ კი რეჟიმის გარდაუვალი დამხობის მოლოდინის გადავლის შემდეგ, ვენესუელის ოპოზიციის ემიგრაციაში მყოფი წევრები გაურკვევლობის პერიოდში აღმოჩნდნენ. ყოყმანითა და გაურკვევლობით მოცულნი, ისინი მერყეობენ დემოკრატიული ტრანზიციის იმედსა და იმის შიშს შორის, რომ ჩავისტური სისტემა კარაკასში შენარჩუნდება და დროთა განმავლობაში კიდევ უფრო განმტკიცდება“, – ნათქვამია სტატიაში.
„ერთმა სურათმა მათი იმედები გააქარწყლა: მასზე აღბეჭდილია დელსი როდრიგესი, რომელიც ვენესუელის პრეზიდენტის მოვალეობის შემსრულებელი ოფიციალურად გახდა. მას მარცხენა ხელი აღმართული აქვს თავისი ძმის, ეროვნული ასამბლეის პრეზიდენტის, ხორხე როდრიგესის წინაშე, ხოლო მარჯვენა ხელი უდევს ბიბლიაზე, რომელიც ნიკოლას მადურო უმცროსს უჭირავს. გზავნილი ნათელია: თავი დაეცა, მაგრამ სისტემა მტკიცედ დგას“, – წერს სტატიის ავტორი.
გაეროში ვენესუელის ყოფილი ელჩი, მილოს ალკალაი სიტუაციას მკაფიოდ აანალიზებს.
„მეფე და დედოფალი დაეცნენ [მადურო და მისი მეუღლე], თუმცა ჭადრაკის დაფაზე სხვა ფიგურები კვლავ თავიანთ ადგილებზე რჩებიან. მადურომ, ისევე როგორც ჩავესმა, სტალინის მოდელზე დაფუძნებული პიროვნების კულტი დაამკვიდრეს. აქ მათ ერთგვარ სუპერგმირებადაც კი წარმოაჩენენ. დელსი და ხორხე როდრიგესები ამჟამად მხოლოდ „პირველები თანასწორთა შორის“ არიან. ვენესუელის სისტემაში ამ წუთას გამოკვეთილი „პირველი ნომერი“ არ არსებობს“, – ხაზს უსვამს ის.
ბოგოტაში მდებარე როსარიოს უნივერსიტეტის მკვლევარი, რონალ როდრიგესი შექმნილ სიტუაციას აშკარად მუქ ფერებში ხედავს.
„დიქტატურა დიქტატორის გარეშე, რომელიც მოსახლეობის წინააღმდეგ რეპრესიული აპარატის მთელ დინამიკას ინარჩუნებს“, – აღნიშნა მან.
არაერთი მოწმის განცხადებით, ვენესუელელები მართლაც იმყოფებიან ყოვლისმომცველი კონტროლის ქვეშ, რაც გასული შაბათის შემდეგ კიდევ უფრო გამკაცრდა, განსაკუთრებით „კოლექტივოსების“ მხრიდან – რეჟიმის მიერ შეიარაღებული დაჯგუფებები მოსახლეობის სათვალთვალოდ.