პრეზიდენტ ტრამპთან დღევანდელი ძალიან პროდუქტიული შეხვედრის შემდეგ, სადაც სხვადასხვა საკითხი განვიხილეთ, მან მწვანე შუქი აუნთო რუსეთის წინააღმდეგ სანქციების ორპარტიულ კანონპროექტს, რომელზეც სენატორ ბლუმენტალთან და ბევრ სხვასთან ერთად თვეების განმავლობაში ვმუშაობდი, – განაცხადა „რესპუბლიკელმა“ სენატორმა, ლინდსი გრემმა.
„ეს იქნება ძალიან დროული ნაბიჯი, რადგან მაშინ, როდესაც უკრაინა მშვიდობისთვის დათმობებზე მიდის, პუტინი მხოლოდ სიტყვებით შემოიფარგლება და აგრძელებს უდანაშაულოების მკვლელობას“, – აღნიშნა მან.
„ეს კანონპროექტი პრეზიდენტ ტრამპს მისცემს შესაძლებლობას, დასაჯოს ის ქვეყნები, რომლებიც ყიდულობენ იაფ რუსულ ნავთობს და ამით პუტინის ომის მანქანას ასაზრდოებენ“, – განაცხადა სენატორმა.
მისი თქმით, აღნიშნული კანონპროექტი პრეზიდენტ ტრამპს მისცემს უდიდეს ბერკეტს ისეთი ქვეყნების წინააღმდეგ, როგორიცაა ჩინეთი, ინდოეთი და ბრაზილია, რათა მათ გაუჩნდეთ სტიმული, შეწყვიტონ იაფი რუსული ნავთობის შეძენა, რაც აფინანსებს პუტინის მიერ მოწყობილ სისხლისღვრას უკრაინაში.
„ველი ძლიერ ორპარტიულ მხარდაჭერას კენჭისყრისას, იმედია, უკვე მომავალ კვირას“, – დასძინა მან.