აშშ-ის პრეზიდენტს, დონალდ ტრამპს სანქცირებული ნავთობის ტანკერების დაკავების გაგრძელების და რუსეთის პრეზიდენტთან ვლადიმერ პუტინთან ურთიერთობის გაუარესების არ ეშინია, – ამის შესახებ თეთრი სახლის პრესმდივანმა, კეროლაინ ლევიტმა განაცხადა.
მისივე თქმით, დონალდ ტრამპი ყოველთვის დაიცავს პოლიტიკას, რომელიც შეერთებული შტატებისთვის იქნება საუკეთესო.
„ეს ნიშნავს ემბარგოს აღსრულებას „ჩრდილოვანი ფლოტის“ ყველა გემის წინააღმდეგ, რომლებიც ნავთობის ტრანსპორტირებას უკანონოდ ახორციელებენ,“ – განაცხადა კეროლაინ ლევიტმა.
როგორც თეთრი სახლის პრესმდივანი აცხადებს, მას სჯერა, რომ ეს აშშ-სა და რუსეთს შორის დაძაბულობას არ გამოიწვევს, რადგან აშშ-ისა და რუსეთის პრეზიდენტებს კარგი ურთიერთობა აქვთ.
„მე მჯერა, რომ ეს პირადი ურთიერთობები გაგრძელდება“, – განაცხადა ლევიტმა და აღნიშნა, რომ სანქცირებული ტანკერების დაკავება დონალდ ტრამპის ადმინისტრაციის პოლიტიკაა და აშშ-ის პრეზიდენტს ამის განხორციელების არ ეშინია.
თეთრი სახლის პრესმდივნის განცხადებით, დაკავებული ტანკერის, Bella 1-ის ეკიპაჟის წინააღმდეგ, რომლის ბორტზეც რუსები იმყოფებოდნენ, შესაძლოა, შეერთებულ შტატებში სანქციების დარღვევისთვის სისხლის სამართლის საქმე აღიძრას. კეროლაინ ლევიტის თქმით, რუსეთის დროშის ქვეშ მცურავი ტანკერის დაკავება ნათლად აჩვენებს, რომ აშშ სანქციების დარღვევას არ მოითმენს.