ჩვენ ვფიქრობთ, ისეთი საკანონმდებლო ჩარჩო უნდა შეიქმნას ქვეყანაში, რომელიც გრძელვადიანად იქნება ფასების სტაბილურობის განმსაზღვრელი და არა ერთჯერადად ფასების შემცირების განმაპირობებელი, – განაცხადა „დღის ქრონიკაში“ ეკონომიკისა და მდგრადი განვითარების მინისტრის მოადგილემ, ვახტანგ ცინცაძემ ფასების შემცირების პოლიტიკაზე საუბრისას.
მისივე თქმით, არ სურს, გაუსწროს მოვლენებს და ისაუბროს კონკრეტულ მექანიზმებზე, თუ რისი დანერგვა მოხდება, რათა ფასების გრძელვადიანი შემცირება უზრუნველყონ და არა – ერთჯერადად.
„საკითხი საკმაოდ კომპლექსურია და მას კომპლექსური გადაწყვეტა სჭირდება. თუმცა, ერთ-ერთი მიმართულება, რაზეც აქტიურად ვმუშაობთ, არის უსამართლო სავაჭრო პრაქტიკების აღმოფხვრა და აღნიშნულზე საკანონმდებლო რეგულაციების შექმნის შესაძლებლობა. ვხედავთ, რომ სხვადასხვა ქვეყანაში, მათ შორის ევროპულ ქვეყნებში, მსგავსი ტიპის გამოწვევები სხვადასხვა პერიოდში არსებობდა. შესაბამისად, აღნიშნულმა ქვეყნებმა საკანონმდებლო თუ სხვა ტიპის რეგულაციებით უპასუხეს გამოწვევებს. ჩვენ ვფიქრობთ, ისეთი ჩარჩო უნდა შეიქმნას ქვეყანაში, რომელიც გრძელვადიანად იქნება ფასების სტაბილურობის განმსაზღვრელი და არა ერთჯერადად ფასების შემცირების განმაპირობებელი“, – აღნიშნა მინისტრის მოადგილემ.