საფრანგეთის ეროვნულ ასამბლეაში განიხილავენ კანონპროექტს, რომელიც 15 წლამდე ასაკის მოზარდებისთვის სოციალურ ქსელებში შესვლის აკრძალვას ითვალისწინებს. ინიციატივა კიბერბულინგისა და ფსიქიკური ჯანმრთელობის რისკებს უკავშირდება.
„როიტერის“ ცნობით, საფრანგეთის პრეზიდენტი ემანუელ მაკრონი სოციალურ მედიას ახალგაზრდებში ძალადობის ერთ-ერთ მიზეზად მიიჩნევს და მოწოდებით გამოდის, საფრანგეთმა მიბაძოს ავსტრალიის მაგალითს, სადაც 16 წლამდე ასაკის მოზარდებისთვის სოციალური ქსელების აკრძალვა გასულ წელს ამოქმედდა.
კანონპროექტი ჯერ სენატში უნდა დამტკიცდეს, შემდეგ კი საბოლოო კენჭისყრა ქვედა პალატაში გაიმართება.
ევროპარლამენტმა მოუწოდა ევროკავშირს, დააწესოს მინიმალური ასაკი ბავშვებისთვის სოციალურ მედიაზე წვდომისთვის, თუმცა ასაკობრივი შეზღუდვების დაწესება წევრი ქვეყნების გადასაწყვეტია.