ჩეხეთის დედაქალაქ პრაღაში ათასობით ადამიანი პრეზიდენტ პეტრ პაველის მხარდასაჭერად შეიკრიბა.
ორგანიზატორთა შეფასებით, აქციაში 80-90 ათასი ადამიანი მონაწილეობდა. მათივე თქმით, 15 თებერვალს დემონსტრაციები ჩეხეთის სხვა ქალაქებშიცაა დაგეგმილი.
დემონსტრანტებს ხელში ეჭირათ ევროკავშირისა და ჩეხეთის დროშები და სკანდირებდნენ: „მხარს ვუჭერთ პრეზიდენტს“.
აქცია მას შემდეგ გაიმართა, რაც პრეზიდენტმა უარი თქვა ერთ-ერთი მინისტრის დანიშვნაზე, რომელსაც ნაცისტური სიმბოლოების გამოქვეყნებაში ადანაშაულებენ. საქმე ეხება ფილიპ ტურეკს, რომელსაც მთავრობა გარემოს დაცვის მინისტრად ნიშნავდა.
გასულ კვირას ჩეხეთის პრეზიდენტმა, პეტრ პაველმა საჯაროდ განაცხადა, რომ საგარეო საქმეთა მინისტრმა, პეტრ მაჩინკამ მას ესემეს შეტყობინებები გაუგზავნა, რომლითაც პრეზიდენტს სერიოზული „შედეგებით“ ემუქრებოდა, თუ ტურეკის დანიშვნას კვლავ დააბრკოლებდა. აღნიშნული პაველმა შანტაჟად შეაფასა.
პეტრ მაჩინკამ შანტაჟი უარყო. მისი თქმით, შეტყობინებები ჩვეულებრივი პოლიტიკური მოლაპარაკების ნაწილი იყო.