ევროკომისიამ რუსეთის წინააღმდეგ სანქციების მორიგი პაკეტი წარადგინა, რომელიც აფართოებს შეზღუდვებს რუსულ ენერგეტიკაზე, ბანკებზე, საქონელსა და მომსახურებაზე.
„აბუ-დაბიში მიმდინარე მნიშვნელოვანი სამშვიდობო მოლაპარაკებების ფონზე, რეალობას თვალი უნდა გავუსწოროთ: რუსეთი მოლაპარაკებების მაგიდასთან გულწრფელი განზრახვით მხოლოდ იმ შემთხვევაში დაჯდება, თუ მასზე ზეწოლა განხორციელდება. ეს ერთადერთი ენაა, რომელიც რუსეთს ესმის“, – განაცხადა ევროკომისიის პრეზიდენტმა, ურსულა ფონ დერ ლაიენმა თავის განცხადებაში.
სანქციების მე-20 პაკეტი მოიცავს რუსული ნედლი ნავთობისთვის საზღვაო მომსახურების სრულ აკრძალვას და მიზანში იღებს კიდევ 43 გემს, რომლებიც ე.წ. „ჩრდილოვანი ფლოტის“ ნაწილია.
გარდა ამისა, იგი აწესებს აკრძალვებს თხევადი ბუნებრივი აირის ტანკერებისა და ყინულმჭრელების ტექნიკურ მომსახურებასა და სხვა სერვისებზე, რათა კიდევ უფრო დააზიანოს გაზის საექსპორტო პროექტები – ეს ნაბიჯი მათ ევროპული პორტებით სარგებლობის საშუალებას აღარ მისცემს.
ის ასევე აწესებს ახალ აკრძალვებს ლითონების, ქიმიკატებისა და კრიტიკული მინერალების იმპორტზე, ისევე როგორც დამატებით საექსპორტო შეზღუდვებს იმ ნივთებსა და ტექნოლოგიებზე, რომლებიც რუსეთის საბრძოლო მოქმედებებისთვის გამოიყენება, მაგალითად, ასაფეთქებელი ნივთიერებების დასამზადებელ მასალებზე.
სანქციების პაკეტში შეყვანილია კიდევ 20 რუსული რეგიონული ბანკი და მესამე ქვეყნების რამდენიმე ბანკი, რომლებიც მიჩნეულნი არიან სანქცირებული საქონლით ვაჭრობის ხელშემწყობებად.