დიდი ბრიტანეთის პოლიციამ აშშ-ში ბრიტანეთის ყოფილი ელჩის, პიტერ მანდელსონის სახლებში ჩხრეკა მას შემდეგ ჩაატარა, რაც ჯეფრი ეპშტეინთან მისი კავშირების შესახებ ახალი ინფორმაცია გავრცელდა.
ამის შესახებ „სქაი ნიუსი“ იტყობინება.
როგორც მედია იუწყება, პოლიციამ ჩხრეკა მანდელსონის უილტშირისა და ლონდონის სამხრეთით მდებარე ორ სახლში ჩაატარა.
„ჩხრეკა დაკავშირებულია სამსახურებრივი გადაცდომების შესახებ დაწყებულ გამოძიებასთან, რომელშიც 72 წლის მამაკაცი მონაწილეობს. ის არ არის დაკავებული, გამოძიება მიმდინარეობს“, – აღნიშნულია პოლიციის განცხადებაში.
ცნობისთვის, ბრიტანეთის ყოფილმა მინისტრმა, პიტერ მანდელსონმა პრემიერ-მინისტრ კირ სტარმერის ლეიბორისტული პარტია მას შემდეგ დატოვა, რაც ახალი ინფორმაცია გავრცელდა ჯეფრი ეპშტეინთან მისი კავშირების შესახებ. თავად მანდელსონი ეჭვქვეშ აყენებს ბრიტანულ მედიაში გავრცელებულ ინფორმაციას, რომ ეპშტეინისგან ფულადი გადარიცხვები მიიღო.
პიტერ მანდელსონი 2025 წლის 10 თებერვლიდან აშშ-ში ბრიტანეთის ელჩის თანამდებობაზე მუშაობდა. სხვადასხვა პერიოდში იყო ჩრდილოეთ ირლანდიის სახელმწიფო მდივანი, ბიზნესისა და ინოვაციების საკითხებში დიდი ბრიტანეთის პირველი სახელმწიფო მდივანი და საგარეო ვაჭრობის საკითხებში ევროკომისარი.