დიდი ბრიტანეთის პრემიერ-მინისტრის, კირ სტარმერის ადმინისტრაციის უფროსმა, მორგან მაკსვინიმ, კვირას თანამდებობა დატოვა და განაცხადა, რომ მან აიღო პასუხისმგებლობა სტარმერისთვის პიტერ მანდელსონის აშშ-ში ელჩად დანიშვნის შეთავაზების შესახებ, მიუხედავად ჯეფრი ეპშტეინთან მისი ცნობილი კავშირებისა.
ბრიტანეთის პრემიერ-მინისტრი სტარმერი, ჯეფრი ეპშტეინის ცნობილი სკანდალის შემდეგ, მძიმე პოლიტიკურ ვითარებაში აღმოჩნდა.
The Independent-ის ინფორმაციით, კირ სტარმერი „პარლამენტის ლეიბორისტული პარტიის წევრების აჯანყების საშიშროების წინაშე დგას, რადგან ლორდ პიტერ მენდელსონის სკანდალის გამო მისი მთავარი მრჩევლის გადადგომის შემდეგ, ის საკუთარი პოლიტიკური გადარჩენისთვის იბრძვის.“
საზოგადოების აღშფოთება, ამავე გამოცემის ცნობით, გამოიწვია მისმა გადაწყვეტილებამ, ლორდი მენდელსონი აშშ-ში ელჩად დაენიშნა, მიუხედავად იმისა, რომ იცოდა: მისი კავშირები ჯეფრი ეპშტეინთან გაგრძელდა იმ პერიოდშიც, როცა ფინანსისტი ბავშვებზე სექსუალური დანაშაულებისთვის უკვე მსჯავრდებული იყო.
ბოლოს მენდელსონი აშშ-ში დიდი ბრიტანეთის ელჩის თანამდებობას იკავებდა. იგი ამ პოზიციაზე 2025 წლის 10 თებერვალს დაინიშნა, თუმცა, ამავე წლის 11 სექტმებერს, სტარმერმა თანამდებობიდან გაათავისუფლა ეპშტეინის სკანდალის გააქტიურების გამო. წლების განმავლობაში მენდელსონი ბრიტანულ პოლიტიკაში ერთ-ერთი გავლენიანი ფიგურა იყო.
პოლიტიკოსს, ხშირად უწოდებდნენ ლეიბორისტული პარტიის მთავარ სტრატეგს. ის ტონი ბლერისა და გორდონ ბრაუნის ახლო მოკავშირე იყო. სხვადასხვა პერიოდში ეკავა მაღალი თანამდებობები ბიზნესისა და ვაჭრობის სფეროში, მათ შორის, იყო მინისტრი ბრიტანეთის მთავრობაში. ორჯერ იყო ევროკომისარი ვაჭრობის საკითხებში და წარმოადგენდა ევროკავშირს გლობალურ სავაჭრო მოლაპარაკებებში. პიტერ მენდელსონი, ასევე, ლორდთა პალატის წევრიც იყო.
რამდენიმე კვირის წინ, პიტერ მენდელსონი ინტერვიუში აცხადებდა: „რადგან მე გეი მამაკაცი ვიყავი, მე განცალკევებული ვიყავი იმისგან, რასაც ის [ეპშტეინი] თავისი ცხოვრების სექსუალურ მხარეს აკეთებდა“.
თუმცა, კირ სტარმერის განცხადების თანახმად, პრემიერ-მინისტრმა, ელჩის თანამდებობიდან მენდელსონის გადაყენების გადაწყვეტილება იმიტომ მიიღო, რომ „ინფორმაცია, რომელიც გამოქვეყნდა, აჩვენებდა „მისი ურთიერთობის სიღრმეს და ხასიათს ეპშტეინთან“, რაც განსხვავდებოდა იმ ინფორმაციისგან, რაც სტარმერმა პიტერ მენდელსონის დანიშვნისას ეპშტეინთან მისი კავშირის შესახებ იცოდა.