აზერბაიჯანის საგარეო საქმეთა მინისტრმა, ჯეიჰუნ ბაირამოვმა გასცა განკარგულება თეირანის საელჩოდან და თავრიზის გენერალურ საკონსულოდან თანამშრომლების აზერბაიჯანში ევაკუაციის შესახებ. ინფორმაციას აზერბაიჯანული მედია ავრცელებს.
როგორც ბაირამოვმა განაცხადა, მიმდინარე პროცესების ფონზე ადამიანების სიცოცხლის საფრთხეში ჩაგდება არ შეიძლება.
„მოცემულ მომენტში საელჩოს და გენერალური საკონსულოს ევაკუაციისთვის საჭირო მოსამზადებელი სამუშაოები ტარდება“, – აღნიშნა ბაირამოვმა.
ცნობისთვის, გუშინ ირანის მხრიდან აზერბაიჯანის ნახიჩევანის რეგიონში რამდენიმე უპილოტო საფრენი აპარატი შეიჭრა. ერთი დრონი ნახიჩევანის აეროპორტზე დაეცა, ხოლო მეორე – საჯარო სკოლასთან ახლოს. ინციდენტის შედეგად ოთხი ადამიანი დაშავდა. აზერბაიჯანის ხელისუფლებამ მომხდარში ირანული მხარე დაადანაშაულა. ოფიციალური თეირანი, თავის მხრივ, ბრალდებებს უარყოფს.