უკრაინის საგარეო საქმეთა სამინისტრო მოუწოდებს თავის მოქალაქეებს თავი შეიკავონ უნგრეთში გამგზავრებისგან.
როგორც უკრაინის საგარეო უწყების მიერ გავრცელებულ განცხადებაშია აღნიშნული, რეკომენდაცია მას შემდეგ გაიცა, რაც უნგრეთში უკრაინის სახელმწიფო ბანკის, „ოშჩადბანკის“ შვიდი თანამშრომელი და ორი დაჯავშნილი საინკასაციო ავტომობილი, რომლებითაც ფული და ოქრო გადაჰქონდათ, დააკავეს.
„ბუდაპეშტში უკრაინის შვიდი მოქალაქის გატაცებისა და სახელმწიფო ბანკის ქონების ხელში ჩაგდების გამო, საგარეო საქმეთა სამინისტრო ურჩევს უკრაინის მოქალაქეებს თავი შეიკავონ უნგრეთში მოგზაურობისგან იმიტომ, რომ უნგრეთის ხელისუფლების თვითნებური მოქმედებების გამო, მათი უსაფრთხოების დაცვა შეუძლებელია“, – აღნიშნულია უკრაინის საგარეო საქმეთა სამინისტროს განცხადებაში.
უკრაინის საგარეო უწყება აგრეთვე მოუწოდებს ევროპულ და უკრაინულ ბიზნესს ყურადღება მიაქციოს უნგრეთის ტერიტორიაზე არსებულ თვითნებობას და გაითვალისწინოს რისკები ნებისმიერი საქმიანი აქტივობის დროს.