ირანულმა მხარემ დრონებით გუშინდელი შეტევის სერიოზულად გამოძიების პირობა დადო. როგორც Report იუწყება, ამის შესახებ აზერბაიჯანის საგარეო საქმეთა მინისტრმა ჯეიჰუნ ბაირამოვმა დღეს გამართულ ბრიფინგზე განაცხადა.
„გუშინ ირანის საგარეო საქმეთა მინისტრთან სატელეფონო საუბარში სერიოზულად განვიხილეთ ეს საკითხი. ირანული მხარე დაგვპირდა, რომ მომხდარს საფუძვლიანად გამოიძიებს და ჩვენ ველოდებით შედეგებს”, – განაცხადა ბაირამოვმა.
მან ასევე აღნიშნა, რომ სახელმწიფოს მეთაურმა გუშინ მომხდარი შეტევის შემდეგ შესაბამისი მითითებები გასცა.
„ამ ინციდენტთან დაკავშირებით უკვე გადავდგით დიპლომატიური ნაბიჯები, გაგზავნილია საპროტესტო ნოტა, გაიმართა სატელეფონო საუბარო ჩემს კოლეგასთან. ირანული მხარის მიერ დაწყებული გამოძიება საერთო პროცესის ნაწილია. აზერბაიჯანის უსაფრთხოება სახელმწიფოს მეთაურის მკაცრი კონტროლის ქვეშაა”, – განაცხადა მინისტრმა.
ცნობისთვის, გუშინ ირანის მხრიდან აზერბაიჯანის ნახიჩევანის რეგიონში რამდენიმე უპილოტო საფრენი აპარატი შეიჭრა. ერთი დრონი ნახიჩევანის აეროპორტზე დაეცა, ხოლო მეორე – საჯარო სკოლასთან ახლოს. ინციდენტის შედეგად ოთხი ადამიანი დაშავდა. აზერბაიჯანის ხელისუფლებამ მომხდარში ირანული მხარე დაადანაშაულა.