თანაინვესტირების ფონდი ”რუსთავი2”-ს ცრუ ინფორმაციის გავრცელებაში ადანაშაულებს და ჟურნალისტური ეთიკის ქარტიისთვის მიმართვას გეგმავს.
როგორც ფონდის მიერ გავრცელბულ განცხადებაშია აღნიშნული, საუბარია სიუჟეტზე, რომლის თანახმად, ბიძინა ივანიშვილთან დაახლოებულმა კერძო პირებმა 1 ლარად აბაშაში არსებული 200ჰა მიწის ნაკვეთი მიისაკუთრეს.
“2017 წლის 7 ივნისს, “რუსთავი2”-ის ეთერში, გადაცემა “კურიერში”, მრავალი სიცრუისა და უზუსტობის შემცველი სიუჟეტი გავიდა, რომელიც საზოგადოების შეცდომაში შეყვანას ისახავდა მიზნად. ტელეკომპანია “რუსთავი2-ის წარმომადგენელმა, საქართველოს თანაინვესტირების ფონდის მოთხოვნის მიუხედავად, არ მოახდინა კითხვების კომუნიკაცია, შესაბამისად გავრცელებული ინფორმაცია იყო ცალმხრივი და მიკერძოებული. სიუჟეტის თანახმად, ბიძინა ივანიშვილთან დაახლოებულმა კერძო პირებმა, 1 ლარად აბაშაში არსებული 200ჰა მიწის ნაკვეთი მიისაკუთრეს. გვსურს საზოგადოებას ვაცნობოთ, რომ ზემოხსენებულ პროექტს ახორციელებს და ამ მიწის ნაკვეთით მოსარგებლეს წარმოადგენს საქართველოს თანაინვესტირების ფონდი. მოგახსენებთ რომ, აბაშაში არსებული 200ჰა მიწის ნაკვეთი საინვესტიციო ვალდებულებით შპს ”საქართველოს მიწის კორპორაციას” გადაეცა, რომელმაც მიუხედავად აღებული საინვესტიციო ვალდებულებისა, 2015 წლის 27 ნოემბერს, ბიუჯეტში შეიტანა მიწის სრული საბაზრო ღირებულება – 628,310 ლარი, რომელიც ლევან სამხარაულის სახელობის ექპერტიზის ბიუროს მიერ იქნა დადგენილი. მოცემულ ტერიტორიაზე განხორციელდა 4 200 000 ლარის ინვესტიცია, მოყვანილ იქნა ერთწლიანი კულტურები, აშენდა 7500ტ მოცულობის მარცვლეულის შესანახი ელევატორი, რეაბილიტაცია ჩაუტარდა და ბუჩქნარებისგან გაიწმინდა მიწის ფართობები, გაკეთდა 15,6 კმ შიდა გრუნტის გზა, დასაქმდა 35 ადგილობრივი მოსახლე და გზა გაუკეთდა ანჯელის მასივში მცხოვრებ 15 კომლიან სამარღანოს დასახლებას. სამწუხაროა, რომ ”რუსთავი2” აგრძელებს სიცრუის ტირაჟირებას საქართველოს თანაინვესტირების ფონდის მიმართ, მსგავსი დაუზუსტებელი და დამახინჯებული ინფორმაციის გავრცელებისთვის საქართვლოს ჟურნალისტური ეთიკის ქარტიამ უკვე ერთხელ დაადგინა, ქარტიის პირველი პრინციპის (სიზუსტე) დარღვევა, რომელიც 2016 წლის 8 მაისს, ”რუსთავი2”-ის ეთერში გასული გადაცემის ”განსხვავებული აქცენტების“ სიუჟეტს შეეხებოდა. კერძოდ ს.ს. საქართველოს სათბურის კოპრორაციის მიერ აშენებული 12ჰა სათბურის შესახებ გავრცელდა ცრუ ინფორმაცია, მის შესყიდვასა და განვითარებასთან დაკავშირებით. ყოველივე ზემოაღნიშნულიდან გამომდინარე, საქართველოს თანაინვესტირების ფონდი გეგმავს ისევ მიმართოს საქართველოს ჟურნალისტური ეთიკის ქარტიას. ასევე ვიმედოვნებთ, რომ ტელეკომპანია ”რუსთავი-2” და მისი გუნდი, მომავალში თავს შეიკავებს განზრახ სიცრუის გავრცელებისგან და ჩვენს საზოგადოებასთან ურთიერთობის სამსახურთან, წინასწარ, გონივრული ვადით ადრე მოახდენს კითხვების კომუნიკაციას”, – ნათქვამია განცხადებაში, რომელსაც თანაინვესტირების ფონდის საზოგადოებასთან ურთიერთობის სამსახური ავრცელებს.