პოლიტიკური ჯგუფის „ხალხის ძალის“ თავმჯდომარე, დეპუტატი დიმიტრი ხუნდაძე მედიასთან საუბარში გამოეხმაურა ამერიკის შეერთებული შტატების სახელმწიფო მდივან მარკო რუბიოსა და საქართველოს პრემიერ-მინისტრს ირაკლი კობახიძეს შორის გამართულ სატელეფონო საუბარს.
დეპუტატი, მარკო რუბიოს მიერ, საქართველოს პრემიერ-მინისტრთან განხორციელებულ სატელეფონო ზარს მნიშვნელოვან პოლიტიკურ მოვლენას უწოდებს და გამოთქვამს იმედს, რომ საქართველო-ამერიკას შორის პარტნიორული, თანასწორუფლებიანი ურთიერთობები აღდგება.
„ეს მნიშვნელოვანი პოლიტიკური მოვლენაა, მაგრამ ეს არ მომხდარა ისე, რომ რუბიოს უცებ გაახსენდა საქართველო და დარეკა. ამას ჰქონდა თავისი წინაპირობები. გახსოვთ ალბათ, როცა სახელმწიფო უსაფრთხოების სამსახურის უფროსი, მამუკა მდინარაძე იმყოფებოდა აშშ-ში. შემდეგ იყო ვიზიტები საგარეო საქმეთა მინისტრის, პარლამენტის საგარეო ურთიერთობათა კომიტეტის თავმჯდომარის, ასევე, მიხეილ ყაველაშვილის ვიზიტი და შეხვედრები პრეზიდენტთან და ამერიკის მაღალ პოლიტიკურ წარმომადგენლობასთან. ჩვენი ხელისუფლების მხრიდან იყო გაკეთებული ღია განაცხადი, რომ საქართველო მზად არის, მოხდეს გადატვირთვა ამერიკა-საქართველოს ურთიერთობებში. იყო მზაობა, მრავალი საქმიანი და შედეგიანი ვიზიტები და ადეკვატურია როცა მზაობა ორმხრივია, იქნება ორივე მხრიდან ვიზიტებიც და სატელეფონო ზარიც. რა თქმა უნდა, მნიშვნელოვანია, როცა ბატონი რუბიო ახორციელებს ზარს პრემიერ-მინისტრთან და აქვთ გულწრფელი საუბარი. ეს არის კიდევ ერთი მნიშვნელოვანი პოზიტიური ნაბიჯი, მიმართული იმისკენ რომ ორ ქვეყანას შორის მოხდება დაახლოება და პარტნიორული, თანასწორუფლებიანი ურთიერთობები აღდგება“, – განაცხადა დიმიტრი ხუნდაძემ.