პატრიარქის მემკვიდრეობასთან დაკავშირებულ დისკუსიებს გამოეხმაურა პარტია „ხალხის ძალის“ წევრი დავით ქართველიშვილი.
მისი განცხადებით, ეჭვების გაჩენა იმის შესახებ, დატოვა თუ არა ილია მეორემ ღირსეული მემკვიდრეები, მიუღებელია და პატრიარქის ავტორიტეტის დაკნინებას ემსახურება.
„ეს არის ეჭვის შეტანა იმაში, რომ უწმინდესმა დატოვა მემკვიდრეობა, მოწაფეები და თითქოს არც ერთი ამ მოწაფეთაგან არაა იმის ღირსი, რომ ილია მეორის ნახევარსაუკუნოვანი ეპოქა მისი სახელობის საქართველოს ეპოქაში გააგრძელოს? საიდან მოდის ეს?
ეს არ არის კეთილი ზრახვა — ეს არის პატრიარქის სულის, მისი ავტორიტეტის დაკნინება. ეჭვებს ბადებს: არიან კი ის ადამიანები, ვინც ამ ინიციატივებით გამოდიან, მისი მემკვიდრეები და მოსწავლეები?
მე ემოციურად ვიზიარებ პათოსს — თუკი პატივს სცემდი უწმინდესს, თუკი თავს მის მოწაფედ თვლიდი და გწამს მისი მემკვიდრეობის, შენ უნდა მიიღო ის გადაწყვეტილება, რაც მან 2017 წლის 28 ნოემბერს, გიორგობის წირვის დროს, ქადაგებისას გამოაცხადა, როგორც წმინდა გიორგის მიერ ნაკარნახევი გადაწყვეტილება.
თუკი ეს შენთვის არაფერს ნიშნავს, მაშინ როგორი მორწმუნე და მოწაფე ხარ? მაგრამ თუ ეს გწამს და გჯერა, მაშინ საუკეთესო გამოსავალი იქნებოდა, რომ კანდიდატურა მოეხსნა ყველას ერთის სასარგებლოდ,“ — განაცხადა დავით ქართველიშვილმა.