ირანმა მიმდინარე კვირას ჰორმუზის სრუტეში დამატებითი ნაღმები განათავსა. ინფორმაციას AXIOS-ი ერთ-ერთ ამერიკელ მაღალჩინოსანზე დაყრდნობით ავრცელებს.
გამოცემის ცნობით, სრუტეში ნაღმები ისლამური რევოლუციის გუშაგთა კორპუსის სამხედრო-საზღვაო ძალების წარმომადგენლებმა განათავსეს. ამის ფონზე ვითარება რეგიონში სულ უფრო იძაბება: ირანი უტევს კომერციულ გემებს, ხოლო აშშ საზღვაო ბლოკადას აწესებს.
როგორც სტატიაშია აღნიშნული, დამატებითი ნაღმების განთავსებამ ნავთობის ბაზარზე არსებული კრიზისი, შესაძლოა, უფრო გააღრმაოს. საერთაშორისო ენერგეტიკულმა სააგენტომ უკვე უწოდა შექმნილ ვითარებას 1970-იანი წლების შემდეგ ყველაზე მასშტაბური სანავთობო კრიზისი.
AXIOS-ის ცნობით, ეს სრუტის დანაღმვის უკვე მეორე შემთხვევაა. ამასთან ერთად, ჯერჯერობით უცნობია, შეძლეს, თუ არა ამერიკელებმა განთავსებული ნაღმების აღმოჩენა და განადგურება.