ჯაშუშობისთვის დაკავებული გიორგი უძილაურისთვის აღკვეთის ღონისძიების შეფარდებაზე სასამართლო, სავარაუდოდ, დღეს იმსჯელებს. ადვოკატის განცხადებით, უცხო ქვეყნის სპეცსამსახურის თანამშრომლების დავალებით ინფორმაციის შეგროვებისა და გადაცემის ბრალდებით დაკავებული დუმილს ირჩევს და ჩვენების მიცემაზე უარს ამბობს.
უძილაურის უფლებადამცველი საქმის მასალებს სახელმწიფო უსაფრთხოების სამსახურში რამდენიმე საათის განმავლობაში ეცნობოდა. საქმეს საიდუმლო სტატუსი მიენიჭა. ადვოკატმა გაუთქმელობის დოკუმენტს ხელი მოაწერა.
გიორგი უძილაური ფინანსთა სამინისტროს საგამოძიებო სამსახურის ერთ-ერთი მთავარი სამმართველოს უფროსის პოზიციას იკავებდა.
სახელმწიფო უსაფრთხოების სამსახურის ინფორმაციით, უძილაური სისტემურად მოიპოვებდა ინფორმაციას და უცხო ქვეყნის სპეცსამსახურს გადასცემდა. ის მატერიალური სარგებლის მიღების სანაცვლოდ საქმიანობდა. დანაშაული 8-დან 12 წლამდე პატიმრობას ითვალისწინებს.