პრემიერ-მინისტრმა გიორგი კვირიკაშვილმა და შს მინისტრმა გიორგი მღებრიშვილმა შშს-ს თანამშრომლები, მაშველები, მესაზღვრეები, პატრულ ინსპექტორები და 112-ის ოპერატორი სამსახურებრივი მოვალეობის სანიმუშოდ შესრულებისთვისა და სამაშველო ღონისძიებების დროს გამოჩენილი მამაცობისთვის დააჯილდოვეს.
გიორგი კვირიკაშვილმა ჩხოროწყუში სამაშველო ოპერაციაში მონაწილეობისთვის, შსს-ს სასაზღვრო პოლიციის მფრინავებს – ბესო გაბიანს, ბესო ბაკურიძეს, შალვა შალიბაშვილსა და დიმიტრი ქააძეს ღირსების ორდენები გადასცა.
შინაგან საქმეთა მინიტრმა კი უწყების 17 თანამშრომელი სამსახურეობრივი მოვალეობის დროს გამიჩენილი მამაცობისთვის სამინისტროს მედლით “მამაცობისთვის” დააჯილდოვა, ხოლო ორს მადლობის სიგელები გადასცა.
”ეს ადამიანები მარტო დღევანდელი დღის გმირები არ არიან. ისინი ჩვენი დროის და ჩვენი ქვეყნის გმირები არიან და მე ამას ხშირად აღვნიშნავ. ამ გმირობას მათი ყოველდღიური საქმიანობა ამტკიცებს, როცა საკუთარი სიცოცხლისა და ჯანმრთლობის რისკის ფასად მზად არიან სხვა ადამიანების გადასარჩენად თავი გასწირონ. ჩემთვის დიდი პატივი და პასუხისმგებლობაა, ვიყო მათი ხელმძღვანელი”, – განაცხადა გიორგი მღებრიშვილმა.
დაჯილდოების ცერემონიაზე წარმოდგენილი იყო სამაშველო ღონისძიებების ამსახველი დოკუმენტური ვიდეორგოლი. ღონისძიებას შს სამინისტროს დაჯილდოებული თანამშრომლების ოჯახის წევრები და მათ მიერ გადარჩენილი მოქალაქეები ესწრებოდნენ.