აშშ-ის სახელმწიფო მდივანმა, მარკო რუბიომ განაცხადა, რომ „ნატო-ს ძლიერი მხარდამჭერია“. აღნიშნული განცხადება აშშ-ის სახელმწიფო მდივანმა რომში იტალიის პრემიერ-მინისტრთან, ჯორჯია მელონისთან შეხვედრის შემდეგ გააკეთა.
„პოლიტიკოს“ ცნობით, რუბიომ ეს განცხადება იმ ფონზე გააკეთა, როდესაც აშშ-სა და იტალიას შორის დაძაბულობა იზრდება.
თავის მხრივ, იტალიის პრემიერ-მინისტრმა რუბიოსთან შეხვედრა შეაფასა, როგორც „პროდუქტიული“ და „პირდაპირი“ საუბარი „ორ სახელმწიფოს შორის, რომლებსაც კარგად ესმით, რამდენად აუცილებელია, თითოეულმა დაიცვას საკუთარი ეროვნული ინტერესები“.
ცნობისთვის, მანამდე აშშ-ის პრეზიდენტი დონალდ ტრამპი ევროკავშირს უფრო მაღალი სავაჭრო ტარიფებით დაემუქრა და ასევე არ გამორიცხა აშშ-ის სამხედროების გაყვანა იტალიიდან და ესპანეთიდან.
იტალიური მედიის ინფორმაციით, რუბიომ განაცხადა, რომ მან მელონისთან პირდაპირ არ განიხილა ჯარების გაყვანის საკითხი, თუმცა დაამატა, რომ „ზოგიერთმა ევროპულმა ქვეყანამ უარი უთხრა აშშ-ს თავიანთი ბაზების გამოყენებაზე ძალიან სერიოზული საგანგებო სიტუაციის დროს“, რამაც „აშშ-ისთვის გარკვეული არასაჭირო რისკები შექმნა“. ამასთან, რუბიომ აღნიშნა, რომ ამერიკელი სამხედროების ევროპული ბაზებიდან გაყვანა „პრეზიდენტის გადასაწყვეტია“.