რთულად დასაჯერებელი, ვიტყოდი რომ წარმოუდგენელია ტელეკომპანია „იმედის“ წინააღმდეგ სანქციებით მუქარა, ეს ნიშნავს რომ სიტყვის თავისუფლება შერჩევითია, – განაცხადა გადაცემა „იმედის კვირასთან“ ევროპარლამენტარმა ირმჰილდ ბოსდორფმა ტელეკომპანია „იმედის“ სანქცირების მოთხოვნასთან დაკავშირებით, რომელიც საქართველოს შესახებ ანგარიშში ევროპარლამენტარების – რასა იუკნევიჩიენესა და მირიამ ლექსმანის ინიციტივით შევიდა.
მისივე თქმით, ეს გასაკვირი არ არის, ვინაიდან იგივე მიდგომა იყო არჩევნების მიმართაც.
„ბრიუსელისთვის მიუღებელი პოლიტიკური პარტიის გამარჯვება ინათლება დემოკრატიულ უკუსვლად, მათი მომხრეთა ტრიუმფი კი დემოკრატიის ზეიმად. რუმინეთში ჩატარებული არჩევნების შედეგები საერთოდ გააუქმეს. თავისუფალ ქვეყანაში მცხოვრები თავისუფალი მოქალაქეები თავად უნდა ირჩევდნენ, თუ რომელ საინფორმაციო წყაროს ადევნონ თვალი, ევროპარლამენტში კი ვხედავთ, როგორ ცდილობენ ამ თავისუფლების შეზღუდვას“, – აღნიშნა ირმჰილდ ბოსდორფმა.
ევროპარლამენტის საგარეო კომიტეტმა მხარი დაუჭირა რასა იუკნევიჩიენეს ანგარიშის პროექტს და შესწორებებს. დოკუმენტი, სავარაუდოდ, 18-21 მაისის პლენარული სხდომის დღის წესრიგში შევა. რასა იუკნევიჩიენე ამტკიცებს, რომ საქართველო კანდიდატი ქვეყნის კრიტერიუმებს ვერ აკმაყოფილებს და პერსონალურ სანქციებს ითხოვს. ასევე, შესწორებებით მოთხოვნილია სამი დამოუკიდებელი ტელეკომპანიის სანქცირება.