ჩვენი დამოუკიდებლობის ისტორიაში ეს ვიზიტი საქართველოს პარლამენტის თავმჯდომარის პირველი ვიზიტია სლოვაკეთში. ეს ხაზს უსვამს, რამხელა მნიშვნელობა აქვს ორმხრივი ურთიერთობის ახალ ეტაპს, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
პაპუაშვილმა მედიის წარმომადგენლებთან სლოვაკეთში ვიზიტი შეაჯამა.
„კოლეგებთან ერთად შესაძლებლობა მქონდა, ორმხრივ ურთიერთობებთან ერთად, სლოვაკეთის პარლამენტის თავმჯდომარესთან ევროკავშირში ინტეგრაციის გზაზე გვესაუბრა. სლოვაკეთის პოზიცია მნიშვნელოვანია, რომელიც სრულად ემთხვევა ბრიუსელთან არსებულ დღევანდელ ვითარებაზე ჩვენს მიდგომას, რომ არასწორია კონფრონტაციის გზა, რომელიც ბრიუსელმა აირჩია და ერთადერთი გზა, რომელიც ევროკავშირს ეკადრება, დიალოგის გზაა, რომელსაც საქართველოს მთავრობა სთავაზობს ბრიუსელს. სამწუხაროდ, ბრიუსელის ბიუროკრატიის მხრიდან ყრუ კედელს ვხედავთ. ამიტომ, იმედია, სლოვაკეთისა და მსგავსი მეგობრების მხარდაჭერით შევძლებთ, შეჩერდეს კონფრონტაციული ტონი, რომელიც ბრიუსელიდან მოდის და დიალოგის ეტაპზე გადავალთ“, – განაცხადა პაპუაშვილმა.
ამასთან, როგორც პაპუაშვილმა აღნიშნა, სლოვაკეთი განსაკუთრებით აფასებს და ყურადღებას აქცევს საქართველოს, როგორც დამაკავშირებლის როლს ევროპასა და აზიას შორის.
„სლოვაკეთს სრულად აქვს გაცნობიერებული, რომ არ შეიძლება, დღევანდელ სამყაროში ქვეყანამ არ იფიქროს საკუთარი ეკონომიკური ინტერესების დივერსიფიკაციაზე, ტრანსპორტირების გზებზე, ენერგორესურსებზე წვდომაზე. ამ მხრივ სლოვაკეთი ძალიან ჭკვიანურად და წინდახედულად უდგება საკითხს. ამიტომ აქაც მნიშვნელოვანია თანამშრომლობა საქართველოს როლის გათვალისწინებით. შევთანხმდით პარლამენტებს შორის როლის უფრო გაძლიერებაზე როგორც კომიტეტებს, ასევე საქართველოსა და სლოვაკეთის პარლამენტის აპარატებს შორის, რათა ერთმანეთს გავუზიაროთ გამოცდილება, რომელიც სხვადასხვა მიმართულებით გვაქვს. სლოვაკეთის პარლამენტის თავმჯდომარე საქართველოში მოვიწვიე. იმედი მაქვს, შესაძლებლობა გვექნება, ვუპასუხოთ იმ განსაკუთრებულ სტუმარმასპინძლობას, რომელიც სლოვაკეთში ვიგრძენით“, – განაცხადა შალვა პაპუაშვილმა.