აშშ-ის ენერგეტიკის დეპარტამენტმა სტრატეგიული სანავთობო მარაგიდან 53,3 მილიონი ბარელის მოცულობის ნავთობი თავისუფალ მიმოქცევაში გამოუშვა. ინფორმაციას CNN-ი ავრცელებს.
ამერიკული ტელეარხის ცნობით, აშშ-ის ხელისუფლებამ აღნიშნული ნაბიჯი ირანის წინააღმდეგ ამერიკა-ისრაელის ომით გამოწვეული ნავთობზე მაღალი ფასების სტაბილიზაციის მიზნით გადადგა.
საერთო ჯამში, აშშ 172 მილიონი ბარელის ოდენობის ნავთობის გამოშვებას გეგმავს. ეს არის მარტში გამოცხადებული საერთო ინიციატივის ნაწილი, რომლის თანახმადაც 30-ზე მეტმა ქვეყანამ მსოფლიო ბაზარზე ნავთობის მოცულობა 400 მილიონი ბარელით უნდა გაზარდოს, რათა საერთაშორისო ფასები დაასტაბილუროს.
CNN-ის ცნობით, ირანის მიერ ჰორმუზის სრუტის ჩაკეტვამ, რომლის მეშვეობით მსოფლიო ნავთობისა და გაზის 20% გადაზიდვა ხდებოდა, ნავთობზე ფასის ზრდა და მსოფლიო ეკონომიკაზე ინფლაციური წნეხი გამოიწვია. ირანში ომის დაწყებიდან დღემდე ნავთობზე ფასი დაახლოებით 45%-ით, ანუ ერთ ბარელზე 30 დოლარით გაიზარდა.
აშშ-ის ენერგეტიკის დეპარტამენტის ინფორმაციით, დღეის მდგომარეობით, ამერიკას მსოფლიო ბაზარზე სარეზერვო მარაგებიდან ნავთობის დაახლოებით 35 მილიონი ბარელი აქვს გამოშვებული.