სურსათის ეროვნული სააგენტოს სპეცალისტებმა სხვადასხვა სახეობის სუნელ-სანელებლებში ტყვიის შემცველობაზე კვლევისთვის მთელი საქართველოს მასშტაბით 75 ნიმუში აიღეს. ინფორმაციას სურსათის ეროვნული სააგენტო ავრცელებს.
აღებულ ნიმუშებზე პასუხები უკვე ცნობილია. აღმოჩნდა, რომ 75 ნიმუშიდან დარღვევა 4 შემთხვევაში გამოვლინდა. მოქმედი კანონმდებლობით, 1 კილოგრამ სანელებლებში ტყვიის შემცველობა 5 მილიგრამს არ უნდა აღემატებოდეს.
ტყვიის დაშვებულზე მაღალი შემცველობა აღინიშნა შემდეგ სუნელ-სანელებლებში: წითელი წიწაკა-7,06მგ/კგ (ი.მ „ბადრი ჯახია“); მშრალი აჯიკა-6,38მგ/კგ (ი.მ.“ელგუჯა ჯახაია“); მშრალი აჯიკა-5,96მგ/კგ (ი.მ.“გიგა შარანგია“); სუნელი-5,60მგ/კგ (ი.მ.“მადონა თოდუა“).
კომპანიების ჩამონათვალი სურსათის ეროვნულმა სააგენტომ 75-ივე ნიმუშის გამოკვლევისთანავე გაასაჯაროვა. სააგენტოს ცნობით, გამოვლენილ დარღვევებთან დაკავშირებით, სააგენტოს კანონმდებლობით გათვალისწინებული ღონისძიებები გაატარა. პროდუქცია ამოღებულია ბაზრიდან და მისი განადგურება ყველა საჭირო პროცედურის შემდეგ მოხდება, ხოლო გამოვლენილ დარღვევაზე საზოგადოებას დეტალური ინფორმაცია მიეწოდება.
სურსათის ეროვნული სააგენტოს მიერ ჩატარებული ღონისძიებების და ლაბორატორიული კვლევის შედეგების შესახებ ეცნობება ჯანდაცვის, გარემოს დაცვისა და ფინანსთა სამინისტროებს.
აგრეთვე ინფორმაცია მიეწოდება საქართველოს საკონსულოს ამერიკის შეერთებულ შტატებში. სურსათის ეროვნული სააგენტო მზადყოფნას გამოთქვამს ითანამშრომოს ნიუ-იორკის ჯანდაცვის დეპარტამენტთან კვლევების შედეგების გაცვლის მიზნით.
ნიუ-იორკის ჯანდაცვის დეპარტამენტის განცხადებით, ქართულ სუნელებში ტყვიის საგანგაშო დოზაა.
სურსათის ეროვნულმა სააგენტომ სანელებლების კვლევის პირველადი შედეგები 7 ივლისს გამოაქვეყნა.