აშშ-ის პრეზიდენტმა, დონალდ ტრამპმა განაცხადა, რომ ირანთან სამშვიდობო შეთანხმების მიღწევის მცდელობისას, ამერიკელების ფინანსური სირთულეები მისთვის პრიორიტეტული არ არის.
„მე არ ვფიქრობ ამერიკელების ფინანსურ მდგომარეობაზე“, – განუცხადა მან ჟურნალისტებს ჩინეთში გამგზავრებამდე. „მე არავისზე ვფიქრობ. მხოლოდ ერთ რამეზე ვფიქრობ: ჩვენ არ უნდა დავუშვათ, რომ ირანმა ბირთვული იარაღი ხელში ჩაიგდოს, სულ ეს არის“.
კითხვაზე, ნამდვილად არ ითვალისწინებს თუ არა ომის ფინანსურ გავლენას ამერიკელებზე, ტრამპმა კიდევ ერთხელ აღნიშნა, რომ ირანისთვის ბირთვული იარაღის ფლობის აღკვეთა „ყველაზე მნიშვნელოვანი საკითხია, ბევრად უფრო მნიშვნელოვანი, ვიდრე სხვა დანარჩენი“.
„ეს არის ყველაზე მნიშვნელოვანი რამ, მათ შორის იმის მიუხედავადაც, ჩვენი საფონდო ბაზარი, რომელიც, სხვათა შორის, ყველა დროის მაქსიმუმზეა, ცოტათი აიწევს თუ დაიწევს; ყველაზე მნიშვნელოვანი მაინც ისაა, რომ ირანს არ ჰქონდეს ბირთვული იარაღი“, – თქვა მან.