დონალდ ტრამპი ოთხშაბათს პეკინში ჩავიდა და ჩინეთის ლიდერისგან, სი ძინპინისგან ამერიკული კორპორაციებისთვის ქვეყნის „გახსნა“ მოითხოვა – ამით მან სცადა, რომ ორდღიანი სამიტის ფარგლებში თავისი ვიზიტის ცენტრალურ თემად უფრო მჭიდრო ბიზნესკავშირები ექცია, – წერს ბრიტანული გამოცემა Financial Times-ი.
აშშ-ის პრეზიდენტის მოწოდება, რომელიც ჩინეთში მაღალი რანგის ბიზნესმენების თანხლებით იმყოფება, ხუთშაბათისა და პარასკევის შეხვედრების წინ გაჟღერდა.
აღნიშნულ შეხვედრებს ჩრდილს აყენებს გეოპოლიტიკური დაძაბულობა ირანისა და ტაივანის ირგვლივ, ასევე სავაჭრო და ტექნოლოგიური კონფლიქტი, რამაც მსოფლიოს უმსხვილეს ეკონომიკებს შორის ურთიერთობები დაძაბა.
ტრამპმა განაცხადა, რომ მისი „პირველივე თხოვნა“ სი ძინპინისადმი წამყვანი ამერიკული კომპანიებისთვის უფრო ხელსაყრელი გარემოს შექმნა იქნება, რომლებიც დიდი ხანია ჩივიან ჩინეთში საქმიანობისას არსებულ მარეგულირებელ დაბრკოლებებზე.
აშშ-ის პრეზიდენტი ჩინეთთან ეკონომიკური ურთიერთობების დასტაბილურებას ცდილობს მას შემდეგ, რაც გასულ წელს ვაშინგტონის მიერ ჩინურ იმპორტზე გაზრდილი ტარიფების დაწესებამ პეკინს იშვიათი წიაღისეულის ექსპორტის შეზღუდვისკენ უბიძგა. გასულ ოქტომბერში, სამხრეთ კორეაში შეხვედრისას, ტრამპი და სი ერთწლიან სავაჭრო ზავზე შეთანხმდნენ.